1上主㧯𠊎講話；
2佢講：「人子啊，愛㧯泰爾王講，𠊎 — 至高个上主恁樣講：你誇口講，你係神，你像神明坐在海中央个寶座頂。雖然你看自家像神明共樣恁聰明，其實，你係人，毋係神。
3你自認比但以理
聰明，明白囥等个祕密。4你用聰明㧯智識賺盡多錢，寶庫肚積存盡多金銀。
5你盡知做生理个方法，緊來緊好額。你因為自家个好額心肚驕傲！
6「所以，𠊎 — 至高个上主恁樣講：因為你看自家像神明共樣恁聰明，
7𠊎愛帶領列國中最兇惡个敵人來攻打你。你用聰明㧯智識所得到个該兜靚个寶物，全部會被佢等用刀仔毀壞掉，使你个榮光受羞辱。
8佢等會將你㓾死，㧒到海肚去。
9佢等來㓾你个時，你還敢看自家做神明麼？你面對㓾你个人該時，你就會知自家係人，毋係神。
10你愛死在無敬虔个外國人手中。𠊎 — 至高个上主恁樣宣佈了。」
泰爾王个結局11上主又㧯𠊎講話；
12佢講：「人子啊，你愛為泰爾王唱哀歌。愛㧯佢講，𠊎 — 至高个上主恁樣講：你以前係完美个模範，非常聰明又好看。
13你住在上帝个伊甸園肚，用紅寶石、鑽石、黃寶石、水蒼玉、紅瑪瑙、碧玉、藍寶石、綠寶石㧯紅玉來打扮自家，也用金器打扮。你受造該日，𠊎就為你準備好勢。
14𠊎設立一個基路伯去保護你 ；𠊎俾你住在𠊎个聖山頂，在會皓光个珠寶當中行來行去。
15對你受創造到敗壞以前，你个行為係無好嫌个。
16到你生理發達賺大錢，你就充滿暴力，常常犯罪。所以，𠊎迫你離開𠊎个聖山；該保護你个基路伯逐你 離開會皓光个珠寶當中。
17你因為自家恁緣投就驕傲；你為到名聲害自家戇檔腐敗。所以𠊎將你抨在地泥下，用恁樣來警告列王。
18你壞事做盡，做生理無公道，致到打垃圾你該兜聖所。所以𠊎放火燒你，使你變做火灰來俾人看。
19你慘了，永遠滅亡了。認識你个國家全部會著驚，驚佢等會堵到㧯你共樣个結局。」
責備西頓20上主㧯𠊎講話；佢講：
21「人子啊，你愛講預言責備西頓城。
22愛㧯佢等講，𠊎 — 至高个上主恁樣講：西頓啊，𠊎愛㧯你做對敵！人愛因為𠊎責罰你來稱頌𠊎。𠊎一顯明𠊎个神聖，施行審判，佢等就會知𠊎係上主。
23𠊎愛使全城發瘟，血流滿街。敵人會對四面八方來攻打你，㓾掉你个人民。恁樣，你就會知𠊎係上主。」
以色列愛蒙福24上主講：「本來看輕以色列四圍个國家，毋會再像竻仔恁樣刺傷以色列；人就會知𠊎係至高个上主。」
25至高个上主恁樣講：「𠊎愛將四散在各國个以色列人帶轉來；恁樣，列國就會知𠊎係神聖个。以色列人會住在佢等自家个土地上，就係𠊎賜給𠊎僕人雅各个土地。
26佢等會起屋仔、開墾葡萄園，在該位安居樂業。𠊎愛責罰看輕以色列个鄰國，以色列就會享受平安。恁樣，佢等就會知𠊎係上主 — 佢等个上帝。」
Who We AreWhat We EelieveWhat We Do
2025 by iamachristian.org,Inc All rights reserved.
