1上主吩咐摩西
2向以色列人宣佈：「你等當中，無論以色列人抑係暫住个旅客，若係有人將自家个子女獻給邪神摩洛，一定愛判死刑；人民愛用石頭㧹死佢。
3𠊎愛對該人變面，將佢對𠊎个子民中除掉；因為佢將自家个子女獻給摩洛，打垃圾𠊎个聖所，侮辱𠊎个聖名。
4假使該人將自家个子女獻給摩洛，總係人民詐意無看到，毋將佢處死，
5𠊎愛親自對付佢㧯佢个全家；𠊎也愛對付該兜㧯佢共下背叛𠊎去拜摩洛个人。𠊎愛對𠊎个子民中將佢等除掉。
6「若係有人去交鬼抑係去問行邪術个，跈佢等背叛𠊎，𠊎愛對付佢，對𠊎个子民中將佢除掉。
7所以，你等愛將自家分別為聖，成做聖潔，因為𠊎係上主 — 你等个上帝。
8你等愛謹守實行𠊎个法律，因為𠊎係使你等成做聖潔个上主。
9「無論麼人咒罵父母，一定愛判死刑；佢係罪有應得个。
10「若有人㧯鄰舍个𡜵娘私通，姦夫㧯淫婦全部愛判死刑。
11若有人㧯厥爸个𡜵娘私通，羞辱厥爸，兩儕全部愛判死刑；佢等係罪有應得个。
12若有人㧯心舅私通，兩儕全部愛判死刑；佢等亂倫，係罪有應得个。
13若有男人㧯男人有性關係，佢等係做積惡个事，兩儕一定愛判死刑；佢等係罪有應得个。
14若有人討𡜵娘，又㧯丈人𡟓私通，三儕攏總愛用火燒死，來使你等當中个污穢燒淨淨。
15若有男人㧯獸類有性關係，男人一定愛判死刑，你等也愛㓾死該獸類。
16若有女人親近獸類、㧯獸類有性關係，一定愛將女人㧯獸類㓾死；佢等係罪有應得个。
17「若有人討自家親姊妹，無論係無共阿姆抑係無共阿爸个姊妹，彼此有性關係，佢等一定愛公開受侮辱，被人逐出佢等个社區。佢㧯自家个姊妹有亂倫个關係，一定愛擔當佢个罪孽。
18若有人㧯經期內个女人有性關係，一定愛將兩儕逐出社區，因為佢等犯到有關無淨浰个條例。
19「做毋得㧯阿姑抑係阿姨有性關係，這係犯亂倫个罪；兩儕一定會擔當自家个罪孽。
20若有人㧯伯姆抑係叔姆有亂倫个關係，就係侮辱阿伯、阿叔；兩儕愛擔當自家个罪，到死會無子女。
21若有人討阿嫂抑係老弟心舅，就係侮辱自家个兄弟，這係無淨浰个事；兩儕到死會無子女。
22「你等愛遵守𠊎一切个法律，實行𠊎一切个條例，恁樣，𠊎愛𢱋你等入去个迦南地就毋會將你等呸出去。
23你等做毋得學該地先前住民个風俗習慣；因為佢等做這一切个事，𠊎盡惱佢等，愛將佢等逐走，俾你等入去。
24𠊎識應許，你等愛承受佢等个土地；𠊎愛將該垤流乳㧯蜜个土地賜給你等做產業。𠊎係上主 — 你等个上帝；𠊎將你等㧯列國分開。
25所以，你等一定愛分別淨浰㧯無淨浰个飛鳥走獸。你等做毋得食無淨浰个獸類㧯鳥仔；𠊎已經宣佈牠兜係無淨浰个，拿來食會使你等無淨浰。
26你等愛聖潔，愛歸屬𠊎；因為𠊎係上主，係聖潔个。𠊎將你等㧯列國分開，愛使你等做𠊎个子民。
27「所有交鬼抑係算命个男女一定愛判死刑；人民愛用石頭㧹死佢等。這種人係罪有應得个。」
Who We AreWhat We EelieveWhat We Do
2025 by iamachristian.org,Inc All rights reserved.
