傳道書 9 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1𠊎一直研究這一切，看出義人㧯智慧人並佢等个行為全部在上帝个手中；到底係愛惜抑係怨恨，乜無人知。

2所有个事全部係空虛 ，因為逐儕有共樣个命運：無論係義人抑係不義个人，好人抑係壞人，虔誠个抑係無虔誠个，獻祭个抑係無獻祭个，全部共樣。好人所堵到个無一定比罪人好；發誓个無一定比驚發誓个較好。

3逐儕个命運共樣；這也係日頭下所發生一件無公當个事。人還生个時，心肚充滿邪惡㧯癲狂，到尾全部死掉。

4無論麼人，還生个至少還有希望；還生个狗仔比死掉个獅仔較好。

5還生个人知佢等會死；死掉个人麼介都毋知。佢等毋會再得到獎賞；佢等个名無人會記得。

6佢等个愛惜、怨恨、還有嫉妒，攏總㧯佢等共下消失。在日頭下所發生个事，佢等永遠無份了。

7去啊，歡歡喜喜去食飯，快快樂樂去啉酒；因為上帝已經歡喜接納你个工作。

8愛著白淨个衫褲，頭那愛常常膏油。

9盡你一生空虛个日仔，就係上帝賜給你在日頭下个日仔，㧯你所惜个𡜵娘享受人生个快樂，因為這係你在日頭下勞碌所應該得个福份。

10你無論做麼介事，愛煞猛做；因為你所愛去个陰間無工作，無計劃，無智識，也無智慧。

11𠊎又發現一件事：在日頭下，盡會走个人無一定得獎，勇士無一定打贏，智慧人無一定有飯食，精明人無一定好額，有學問个人無一定坐大位。時機㧯運氣決定一切。

12無人知自家个時機㧯運氣。就像魚仔被魚網網到，鳥仔被網仔捉到，全無想到个時，壞運忽然臨頭。

智慧贏過戇檔

13𠊎又看到日頭下一件有關智慧个事，感覺當有意思。

14有一座無幾多人住个細城，有一個強國个王來攻擊；佢包圍該城，起高高个土堆來攻打，準備破城。

15城肚有一個人當苦，總係當有智慧，佢用智慧解救該城。總係，無人紀念佢。

16𠊎常常講，智慧贏過武力，總係窮人个智慧受藐視，佢个話無人愛聽。

17其實，聽智慧人細聲講幾句話，贏過聽戇檔个統治者大聲喊。

18智慧會比武器有更大个成就；總係一個罪人會破壞盡多好事。