以賽亞書 13 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上帝愛責罰巴比倫

1這係上帝給亞摩斯个孻仔以賽亞个啟示，係有關巴比倫个信息。

2愛在光光个山岡頂插一支戰旗。愛向戰士擛手、大聲發出命令，喊佢等攻入該兜貴族个門。

3上主已經點齊該兜充滿信心个勇士，喊佢等去打贏這場聖戰；佢愛責罰該兜惹佢發譴个國家。

4聽啊！山頂有盡多吵鬧个聲；該係萬民大聲喊个聲，係盡多國家集合个聲。上主 — 萬軍个元帥已經點齊軍隊，準備相㓾。

5佢等係對天邊、對遠遠个國家過來个。上主愛在大發譴中毀滅全國。

6大聲盡噭啊！上主个日仔近了！全能个上帝施行毀滅个日仔到了！

7逐儕个手軟軟無力；逐個人無半點勇氣！

8佢等非常著驚；佢等受盡痛苦，像婦女生產時个陣痛。佢等你看𠊎、𠊎看你，緊看緊驚；面紅際炸。

9上主个日仔會到了！一定會有殘忍、痛恨㧯大發譴！全世界會成做荒地；逐個罪人全部會滅亡。

10天頂个星仔全部毋會發光；日頭一出就暗掉，月光乜朦朦無光。

11上主講：「𠊎愛使這世界因為充滿壞行為受責罰，使壞人因為所犯个罪受責罰。𠊎愛結束驕傲人个自大，制伏殘忍㧯強暴个人。

12贏過這試煉个人會比純金較少。

13𠊎愛使天挺動、地搖動；因為這係𠊎 — 上主、萬軍个元帥受氣㧯大發譴个日仔。

14「住在這位个外國人會走轉自家个家鄉，四散逃走，像被獵人逐个鹿群，像無牧人照顧个羊群。

15被人逐到个全部會被人㓾死；被人捉到个全部會死在刀下。

16佢等个孲𤘅仔會在佢等面前被人㧹死；佢等个屋仔被人搶奪；佢等个𡜵娘受人侮辱。」

17上主講：「𠊎愛唆慫米底亞人 去攻打巴比倫。米底亞人毋貪白銀，無愛黃金。

18佢等愛用箭射死後生人；佢等毋會憐憫孲𤘅仔，也毋會體恤細人仔。

19巴比倫本來係像寶石恁靚个王國，係巴比倫人个光榮。總係𠊎 — 上帝愛毀滅它，就像𠊎識毀滅所多瑪㧯蛾摩拉一樣。

20永遠毋會再有人在該位住；毋會有阿拉伯人在該位搭帳篷，也毋會有牧人在該位掌羊。

21該所在會被野獸佔去住；貓頭鳥會在該位做藪，鴕鳥住在該位，野山羊在該位跳來跳去，

22豺狼會在守衛所大聲噭，野狗在華麗个王宮肚緊吠。巴比倫大難臨頭了！它个日仔無久了！」