啟示錄 20 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

一千年

1然後，𠊎看到有一個天使對天頂下來，手拿等無底坑个鎖匙㧯一條大鍊仔。

2佢將該條惡龍，就係該尾老蛇，名安到魔鬼抑係撒但个，捉起來，將牠捆綁一千年。

3天使將牠㧒落無底坑，關起來，揝等封印，毋俾牠再去迷惑列國，直到這一千年滿。期限過掉，牠一定會暫時得到透放。

4𠊎又看到一兜寶座；該兜坐在頂高个人全部得到審判个權柄。𠊎也看到該兜因為宣揚耶穌所啟示个真理、又為到上帝个真道被人斬頭个人个靈魂。佢等毋識拜該隻惡獸抑係牠个像，額頭抑係手骨也無該隻惡獸个名號。佢等全部復活了，同基督共下做王一千年。

5(其他个死人愛等這一千年滿正復活。) 這係頭一擺个復活。

6有份在頭一擺復活个係聖潔有福氣个人。第二擺个死無權轄制佢等；反轉佢等愛做上帝㧯基督个祭司，愛同基督共下做王一千年。

打贏撒但

7這一千年以後，撒但會對監牢得到透放，

8會去迷惑地上四方个列國，就係歌革㧯瑪各。撒但會將佢等聚集起來，出去相㓾；佢等个數目像海滣个沙仔恁多。

9佢等遍滿全地，圍困聖徒个營房 — 上帝所惜个城。總係有火對天頂降下來，燒滅佢等。

10該迷惑佢等个魔鬼被天使㧒落硫磺火湖底背；該隻惡獸㧯假先知早就在該位。在該位，佢等會日夜受苦，直到永永遠遠。

最後个審判

11接等，𠊎看到一張白色个大寶座㧯該坐在寶座上个。天㧯地攏總對佢个面前逃走，無蹤無跡。

12𠊎又看到該兜死掉个人，無論尊貴抑係卑微个，全部企在寶座前。該兜書卷已經打開來了；另外有一本生命冊也打開來。死掉个人全部係照佢等个行為，根據這兜書卷所記載个，接受審判。

13然後，海就將其中个死人交出來；死㧯陰間也將其中所關个死人交出來。這兜人全部照佢等个行為接受審判。

14死㧯陰間也被該坐在寶座上个 㧒落火湖底背。 (這火湖就係第二擺个死。)

15麼人个名無記在生命冊，佢就被該坐在寶座上个㧒落火湖底背。