尼希米記 6 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

對敵个陰謀

1 參巴拉、多比雅、阿拉伯人基善，㧯𠊎等其他仇敵聽到𠊎已經整好城牆，全無缺口 (其實𠊎還吂在入口安城門)。

2所以參巴拉㧯基善派人送信仔給𠊎，建議𠊎在阿挪平原个一個村莊㧯佢等見面。這係佢等个計謀，想愛害𠊎。

3𠊎派人去㧯佢等講：「𠊎這下進行重要个工作，無辦法去。𠊎樣會去看你等來使工作停跎哪？」

4佢等四擺給𠊎共樣个公文，逐擺𠊎全部用共樣个話應佢等。

5後來，參巴拉派佢个僕人帶給𠊎第五封公文；這係一封無封口个信仔 。

6信仔講：

「基善㧯𠊎講，附近人民傳恁樣个風聲，講你㧯猶太人想愛造反，所以你正會重建城牆。佢還講，你自家想愛做王，

7已經安排先知在耶路撒冷愛宣告你係猶大个王。皇帝一定會聽到這事。所以，𠊎建議你來㧯𠊎見面，大家來互相參詳。」

8𠊎就回覆佢講：「你所講个全部無影，係你自家造話出來个。」

9佢等想愛嚇𠊎等，使𠊎等手軟來停工。𠊎祈禱講：「上帝啊，求你使𠊎个手堅強！」

10這時，𠊎去見示瑪雅。佢係米希大別个孫仔，第來雅个孻仔；佢做毋得離開屋下。佢對𠊎講：「𫣆等一定愛去囥在上帝聖殿个聖所，門閂好，因為有人愛來㓾你，佢等會在暗晡頭來㓾你。」

11𠊎應講：「𠊎毋係該種走去囥个人！你恅到𠊎這種人會去囥在聖殿，保留自家个命係麼？𠊎毋去！」

12𠊎將這事認真來想，看出上帝並無派示瑪雅來警告𠊎，佢係被多比雅㧯參巴拉收買个。

13佢等收買佢來嚇𠊎，愛害𠊎犯罪；恁樣，佢等就能譭謗𠊎，侮辱𠊎。

14𠊎祈禱講：「𠊎个上帝啊，求你記得多比雅㧯參巴拉所做个事來刑罰佢等。求你也記得女先知挪亞底㧯其他想愛嚇𠊎个先知。」

工程結束

15經過五十二日个工作，城牆在以祿月 二十五日全部完工。

16𠊎等鄰國該兜敵人聽到全部戇淨淨，因為佢等看出這工程个完成係因為𠊎等上帝个幫助。

17在該站時間，猶太人該兜領袖常常㧯多比雅通信。

18盡多猶大个人民也企在多比雅該片，因為佢係亞拉个孻仔示迦尼个婿郎，佢个孻仔約哈難討比利迦个孻仔米書蘭个妹仔。

19人民常常在𠊎面前講起多比雅个好行為，也將𠊎所講个話傳給佢。同時，多比雅也常常寫信仔嚇𠊎。