撒迦利亞書 5 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

書卷飛等个異象

1𠊎又看，這擺𠊎看到一卷書卷飛過天空。

2天使問𠊎：「你看到麼介？」

𠊎應講：「𠊎看到一卷飛等个書卷，長有九公尺，闊有四公尺半。」

3佢對𠊎講：「這係愛送去全世界个咒詛。一面寫等：『所有做賊个人，愛照書卷所寫个除掉』；一面寫等：『所有發假誓个人，也愛照書卷所寫个除掉。』

4上主 — 萬軍个元帥恁樣講：𠊎愛將這兜咒詛發出去，進入做賊个㧯糮糝用𠊎名發假誓个人屋下。這咒詛愛留在佢等个屋下，將屋仔、連大樑、石頭全部毀滅。」

女人坐在籃肚个異象

5㧯𠊎講話个天使又出現，對𠊎講：「你目珠看頂高，又有東西出來囉！」

6𠊎問：「這係麼介東西？」

佢講：「這係一隻量東西个籃仔；它代表全世界个罪惡 。」

7這籃仔有一隻鉛做个蓋仔。𠊎看个時節，這蓋仔打開來，底背坐等一個女人！

8天使講：「這女人就係代表邪惡。」佢就將這女人㩳入籃肚，將鉛蓋揜好。

9接等𠊎又昂頭看，看到兩個女人向𠊎飛過來；姖等有當大个翼胛，像鸛鳥个翼胛。姖等將籃仔扛起來，飛到天空。

10𠊎問㧯𠊎講話个天使：「姖等愛將籃仔扛到㖠位去？」

11佢應講：「到巴比倫去。姖等愛在該位為到這籃仔起一座殿。殿起好以後，籃仔愛放在底背俾人拜。」