1耶穌又用比喻對佢等講：
2「天國可比一個國王為自家个孻仔準備婚姻个筵席。
3佢派僕人去催佢所請个人客來參加筵席，總係佢等毋肯來。
4佢另外又派一兜僕人去，吩咐佢等㧯人客講：『𠊎个桌席已經擺好了，牛牯㧯肥个頭牲也㓾好，一切全部準備好勢了，請你等來參加婚姻个筵席。』
5總係，該兜受邀請个人客還係毋搭佢，逐儕無閒自家个事情：一個去田項，一個去做生理，
6其他个就捉該兜僕人，侮辱佢等，將佢等打死。
7國王非常發譴，就派兵去除滅該兜兇手，放火燒佢等个城市。
8然後，佢對僕人講：『婚姻个筵席已經擺好，總係先前所請个人無資格了。
9這下你等去大街，將所堵到个人全部請來參加婚姻个筵席。』
10所以僕人就去街路，將所看到个人，無論好壞攏總請來，使婚姻个桌席坐到滿滿。
11「國王出來看人客个時，看到一個無著禮服个人，
12就對佢講：『朋友，你來這位，樣般無著禮服啊？』該人恬恬無出聲。
13國王就吩咐僕人：『將佢个手腳䌈起來，㧒到外背个烏暗中。在該位，佢會大噭，咬牙切齒。』」
14耶穌結論講：「受邀請个人多，總係得到揀選个人少！」
納稅个問題(馬可 12:13-17；路加 20:20-26)15法利賽人出去，彼此參詳愛樣般對耶穌个話尋把柄來害佢。
16佢等派自家个學生，同希律黨个人共下去見耶穌，問講：「先生，𠊎等知你係誠實个人；你忠實將上帝个道理教示人，毋管人樣般想，因為你毋會看人个情面。
17請㧯𠊎等講你个意見：納稅給羅馬皇帝係違背𠊎等个法律麼？」
18耶穌知佢等个壞心術，就講：「假好个人啊，樣般想愛害𠊎？
19拿一隻納稅个銀幣給𠊎看！」
佢等就拿一隻銀幣給佢。
20耶穌問佢等講：「這個像㧯名號係麼人个？」
21佢等應講：「係皇帝个。」
耶穌就對佢等講：「既然係恁樣，將皇帝个東西歸給皇帝，將上帝个東西歸給上帝。」
22佢等聽到這個話，非常希奇，就離開佢。
復活个問題(馬可 12:18-27；路加 20:27-40)23在該日，有兜毋相信復活這件事个撒都該人來見耶穌，問佢講：
24「先生，摩西講：『若係有一個人過身，總係無子女，厥老弟一定愛討守寡个阿嫂做𡜵娘，代阿哥傳宗接代。』
25頭擺，在𠊎等這位識有七個兄弟：大哥結婚後，吂有子女就過身，留下𡜵娘給厥老弟；
26第二個㧯第三個也係恁樣，一直到第七個，情形全部共樣。
27最尾，該婦人家也過身。
28請問，在復活个時節，七個人中姖愛算係㖠一儕个𡜵娘呢？因為佢等全部識㧯姖結婚。」
29耶穌應佢等講：「你等毋著了！你等無明白聖經，也無清楚上帝个權能。
30佢等對死復活个時，係㧯天頂个天使共樣，無討也無嫁。
31關係死人復活个事，你等無讀過上帝㧯你等講个話係麼？
32上帝講：『𠊎係亞伯拉罕个上帝，以撒个上帝，雅各个上帝。』這意思係講，上帝毋係死人个上帝，係生人个上帝。」
33眾人聽到恁樣个教訓，感覺盡希奇。
最大个誡命(馬可 12:28-34；路加 10:25-28)34法利賽人聽講耶穌將撒都該人堵到恬恬，就聚集共下。
35其中有一個法律教師想愛用一個問題來害耶穌，就問佢講：
36「先生，摩西个法律當中，㖠條誡命係最重要个？」
37耶穌講：「『你愛用全部个心志、情感㧯理智敬愛主 — 你个上帝。』
38這係誡命中最大㧯第一重要个。
39第二條也係共樣重要：『你愛惜鄰舍，就像惜自家一樣。』
40全部摩西个法律㧯先知个教訓，就係用這兩條誡命做根據。」
有關基督个問題(馬可 12:35-37；路加 20:41-44)41法利賽人聚集共下个時，耶穌問佢等：
42「你等對基督个看法係樣般？佢係麼人个子孫？」
佢等應講：「佢係大衛个子孫。」
43耶穌講：「恁樣，大衛受聖靈个感動，樣般還稱佢做『主』呢？大衛講：
44主對𠊎个主講：
『你坐在𠊎个右片，
等𠊎使你个仇敵伏在你个腳下。』
45既然大衛稱佢做『主』，基督樣會又係大衛个子孫呢？」
46無人能講半句話來應耶穌。對該日以後，也無人敢再問佢麼介難題。
Who We AreWhat We EelieveWhat We Do
2025 by iamachristian.org,Inc All rights reserved.
