歷代志下 36 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

猶大王約哈斯(列王紀下 23:30-35)

1 猶大人民選約西亞个孻仔約哈斯，在耶路撒冷設立佢做王。

2約哈斯二十三歲个時做猶大王；佢在耶路撒冷統治三個月。

3埃及王尼哥在耶路撒冷捉到佢，罰猶大國愛進貢銀仔三千四百公斤、金仔三十四公斤。

4埃及王尼哥立約哈斯厥哥以利亞敬做猶大㧯耶路撒冷个王，將佢个名改做約雅敬。約哈斯被尼哥捉到埃及去。

猶大王約雅敬(列王紀下 23:36–24:7)

5 約雅敬二十五歲个時做猶大王；佢在耶路撒冷統治十一年。佢行上主 — 佢个上帝看做邪惡个事。

6巴比倫王尼布甲尼撒侵犯猶大，捉到約雅敬，將佢用銅鍊鎖等，帶到巴比倫。

7尼布甲尼撒也將上主聖殿肚个一部份寶物帶到巴比倫，放在自家个王宮肚 。

8約雅敬其他个事，包含佢所做邪惡个事㧯所犯个罪，全部記在《以色列㧯猶大列王史》底背。佢个孻仔約雅斤承接佢做王。

猶大王約雅斤(列王紀下 24:8-17)

9 約雅斤十八歲 个時做猶大王；佢在耶路撒冷統治三個月又十日。佢行上主看做邪惡个事。

10春天个時，尼布甲尼撒王派人將約雅斤㧯上主聖殿肚个寶物帶到巴比倫，然後立約雅斤个阿叔 西底家做猶大㧯耶路撒冷个王。

猶大王西底家(列王紀下 24:18-20；耶利米書 52:1-3)

11 西底家二十一歲个時做猶大王；佢在耶路撒冷統治十一年。

12佢行上主 — 佢个上帝看做邪惡个事，毋肯謙卑聽從先知耶利米所傳上主个話。

耶路撒冷陷落(列王紀下 25:1-21；耶利米書 52:3-11)

13 尼布甲尼撒王識強迫西底家奉上帝个名發誓，愛對佢忠心，總係西底家造反。西底家硬頸毋肯悔改，毋願轉向上主 — 以色列个上帝。

14另外，猶大該兜領袖、祭司，㧯人民也犯了大罪，學佢等周圍个民族去拜偶像，污穢上主在耶路撒冷分別為聖个聖殿。

15上主 — 佢等祖先个上帝一擺又一擺派先知警告佢等，因為佢痛惜佢个子民㧯聖殿。

16佢等反轉藐視上帝个使者，毋搭上帝个話，嘲謔佢个先知。到最後，上主對佢个子民大發譴，致到無人有辦法救佢等。

17上主派巴比倫王來攻打佢等，在聖殿肚㓾死猶大个後生人。無論男女大細，巴比倫王攏總無憐憫。上帝將佢等全部交在佢个手中。

18巴比倫王將上主聖殿肚所有个用品㧯財寶，並王㧯官員个財寶，全部帶到巴比倫去。

19佢燒掉上帝个聖殿，拆掉耶路撒冷个城牆，放火將王宮㧯城內重要个建築燒掉，毀壞城內所有个財寶。

20佢將災難後還生个人帶到巴比倫，強迫佢等在該位做奴才，服事佢㧯佢个後代，直到波斯帝國興起。

21上主通過先知耶利米所預言：「這垤土地愛荒掉七十年，係愛補足該無遵守个安息年 」，這話實現了。

塞魯士皇帝下令猶太人轉去(以斯拉記 1:1-4)

22 波斯王塞魯士登基做皇帝 个第一年，上主為到實現佢通過先知耶利米所講个預言，就感動塞魯士頒佈命令，用字寫下來，傳到全帝國逐所在講：

23「這係波斯皇帝塞魯士个命令：上主 — 天頂个上帝俾𠊎做全世界个統治者；佢愛𠊎負責在猶大个耶路撒冷為佢起一座殿。這下，你等所有屬上帝个子民愛上去該位，願上主 — 你等个上帝㧯你等同在。」