以賽亞書 61 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

拯救个好消息

1至高上主个靈臨到𠊎；

因為上主用油膏𠊎，來揀選𠊎，

喊𠊎向窮苦个人傳福音。

佢派𠊎醫治傷心个人；

喊𠊎宣佈：

被人捉个，會得到釋放；

被人關个，會得到自由。

2佢派𠊎宣佈：

上主賜福个禧年來了；

上帝責罰仇敵个日仔到了。

佢派𠊎去安慰悲傷个人；

3佢愛使錫安悲傷个人

戴冕旒代換塵灰，

膏喜樂油代換憂傷，

著頌讚个衫代換憂愁个心。

佢等會被人看做上主所種个橡樹，結公義个果子；

上主會因為自家所做个得到頌讚。

4佢等會重建荒廢久久个地方，

將原旦荒涼个所在再建設起來；

佢等會重新起歷代毀壞橫掉个城。

5𠊎个子民啊，外族人會來代你等掌羊；

佢等會代你耕種，

照顧你等个葡萄園。

6人會稱你等係上主个祭司，

係服事𠊎等上帝个僕人。

你等會有好享受萬國个財富，

因為得到萬國个榮華來誇口。

7你等毋會再受到侮辱；

你等會再住在自家个土地上。

你等會得到加倍个福份；

你等會享受永遠个喜樂。

8因為𠊎 — 上主歡喜正義；

盡惱搶劫㧯罪惡。

𠊎愛實實在在獎賞𠊎个子民；

𠊎愛㧯佢等立永遠个約。

9佢等个子孫在萬國中會當有名；

佢等个後代在萬民中受人尊重。

看到佢等个人全部承認：

佢等係得到上主賜福个子民。

10𠊎因為上主大大歡喜，

𠊎个心靠上帝得到快樂；

因為佢用救恩做衫俾𠊎著，

用公義做外袍俾𠊎袈等，

像新郎戴禮帽、新娘戴珠寶。

11就像田地樣般使五榖發芽，

種子樣般在園中生長，

至高个上主也愛使公義顯明出來，

使萬國攏總頌讚佢。