1 所羅門个詩歌 ，係詩歌中最靚个詩歌。
第一首(新娘)2願佢用佢个嘴唇唚𠊎！
你个愛情比好酒較香。
3你个身體有香膏个香味；
你个名像香膏發出清香，
當然細妹仔全部恁愛慕你。
4願你牽等𠊎，𠊎等遽遽來去走；
做𠊎个君王，𢱋𠊎入你个間房。
𠊎等愛共下來享受歡喜快樂；
有你个愛情，𠊎較贏享受好酒。
難怪細妹仔全部恁愛慕你！
5 耶路撒冷个細妹仔啊，
𠊎雖然較烏，總係當靚 ，
像基達个烏羊毛帳篷，
像所羅門宮中个布簾。
6毋好因為𠊎恁烏就看輕𠊎，
係日頭將𠊎曬到恁烏个啊！
因為𠊎共𡟓个兄弟向𠊎發譴，
䌠𠊎在葡萄園工作，
𠊎連自家个葡萄園 卻無照顧到！
7𠊎个愛人啊，請㧯𠊎講，
你在㖠位掌羊？
當晝在㖠位俾羊歇睏？
𠊎做麼介愛在你同伴个羊群塍，
像揞等面紗个人緊尋你呢？(新郎)
8最靚个細妹仔啊，
你若毋知該所在，
跈羊群个腳跡去，
在掌羊个帳篷堘，
俾你个山羊食草。
9𠊎个情妹啊，
你像埃及王戰車个駿馬恁靚。
10你兩片个面頰卵因為掛耳環非常靚，
頸筋戴等脖鍊也盡靚。
11𠊎等來為你打金鍊仔，
為你鑲銀仔个妝飾品。
(新娘)12𠊎个君王坐席个時，
𠊎个香水發出香味。
13𠊎个情郎常常靠在𠊎个胸前；
佢就像𠊎帶等一袋沒藥恁香。
14𠊎个情郎像一串鳳仙花，
開在隱‧基底个葡萄園肚。
(新郎)15𠊎个情妹啊，你實在非常靚！
你个目珠像月鴿仔恁溫柔。
(新娘)16情郎啊，你當斯文，當得人惜！
𠊎等做得用青草來準眠床，
17用香柏樹做屋頂个棟樑，
用松樹準做屋頂个桷仔。
Who We AreWhat We EelieveWhat We Do
2025 by iamachristian.org,Inc All rights reserved.
