1天下萬事攏總有定期，
全有上帝特別个時間：
2出世有時，死亡有時；
栽種有時，挷掉有時；
3殺害有時，醫治有時；
拆掉有時，起造有時；
4噭吱有時，歡笑有時；
哀傷有時，跳舞有時；
5同房有時，分房有時 ；
親密有時，冷落有時；
6尋求有時，失落有時；
保存有時，豁掉有時；
7扯爛有時，攣補有時；
恬靜有時，講話有時；
8痛惜有時，怨恨有時；
戰爭有時，和平有時。
9恁樣，做事个人所有个勞碌有麼介價值呢？
10𠊎看出上帝使世間人揹當重个擔頭。
11上帝造个萬物攏總有適當个時間，來顯出萬物个奇妙。佢也使世間人有永生个觀念，總係佢對頭到尾所做个，人無辦法完全明白。
12所以𠊎知，一生人歡喜快樂，又做好事，世間無比這較幸福个。
13𠊎等大家有好食有好啉，享受勞碌个成果，這也係上帝个恩賜。
14𠊎知，上帝所做个一切永遠長存；人無法對上帝个作為增加抑係減少。上帝恁樣做，係愛人敬畏佢。
15這下个事抑係將來會發生个事，頭擺早就有了；因為上帝使共樣个事重複出現。
世界無公平16另外，在日頭下，應該愛有公道㧯正義个所在，𠊎看到个反轉係邪惡。
17𠊎心肚想：「好人、壞人，上帝全部愛審判；因為逐件事情、各種行為个時間全部定好了。」
18𠊎心肚也想：上帝考驗世間人，係愛使𠊎等知，𠊎等無比禽獸較高明。
19人㧯禽獸个命運結局共樣：全部愛透氣，共樣也會死。人並無比禽獸較強；因為全部係空虛。
20全部愛轉到共一個所在；佢等對泥土來，也愛歸轉泥土去。
21麼人知人个靈會上天，禽獸个魂會落地底下呢？
22所以𠊎看，人享受佢勞碌个成果，世間無比這較幸福个；這就係佢个命運。麼人能使佢看到身後个事呢？
Who We AreWhat We EelieveWhat We Do
2025 by iamachristian.org,Inc All rights reserved.
