1上主派先知拿單去見大衛。拿單到大衛該位，對佢講：「某城有兩個人，一個當有錢，一個盡貧窮。
2該有錢人有當多牛羊；
3該窮苦人麼介都無，只有一隻羊牸仔係佢買來畜个。佢照顧羊牸仔，俾羊牸仔㧯自家个子女共下畜大。佢將自家食个、啉个也給羊牸仔食，將羊牸仔揇在佢懷中睡，像自家个妹仔共樣。
4有一日，該有錢人屋下來一個人客；佢毋拌得㓾一隻自家畜个頭牲來招待人客，卻將窮苦人屋下該隻羊牸仔搶來，款待人客。」
5 大衛聽到，對該有錢人非常發譴，對拿單講：「𠊎指等永生上主發誓，做這事个人該死！
6佢做出恁無天良个事，應該賠四倍給佢所搶个人。」
7 拿單對大衛講：「你就係該隻人！上主 — 以色列个上帝恁樣講：『𠊎膏油立你做以色列个王，救你離開掃羅个手。
8𠊎將掃羅个國㧯佢个𡜵娘細姐全部給你，使你做王統治以色列㧯猶大。若係這兜還毋罅擺，𠊎還會加倍賜給你。
9你做麼介違背𠊎个命令？做麼介做恁壞个事？你使赫人烏利亞死在戰場；你借亞捫人个刀㓾死佢，然後搶佢个𡜵娘！
10你恁樣藐視𠊎，搶赫人烏利亞个𡜵娘，你个家會永遠離毋開刀劍。』
11上主恁樣講：『𠊎愛喊你自家屋下个人䟘起來作亂攻擊你。你會看到𠊎將你个𡜵娘細姐給你身邊个男人；這儕人會在光天白日之下㧯姖等睡目。
12你在暗中犯罪，總係𠊎愛在光明个所在使這事顯明出來，俾全以色列人看到。』」
13 大衛對拿單講：「𠊎得罪上主了！」
拿單應講：「上主赦免你；你毋會致到死。
14總係，因為你做這事藐視上主，你這個孻仔會死掉。」
15講煞，拿單就轉屋下去了。
大衛个孻仔死掉上主使烏利亞个𡜵娘㧯大衛所𫱔个細人仔發病。
16大衛祈求上帝俾細人仔康復。佢禁食，逐暗晡入自家个間肚，透夜睡在地上。
17佢內院个老僕人勸佢䟘起來；佢毋肯，也毋㧯佢等共下食飯。
18過一個禮拜，細人仔死掉。大衛个官員毋敢將這個消息㧯佢報告；佢等講：「細人仔還生个時，𠊎等㧯大衛講話，佢就毋肯聽，𠊎等樣般敢㧯佢講細人仔死掉个消息？佢可能會做出傷害自家个事！」
19 大衛發現佢个官員細聲講話，知細人仔已經死掉，就問佢等：「細人仔死掉係麼？」
佢等應講：「係！細人仔死掉了。」
20 大衛就對地上䟘起來，洗身，梳頭，換衫褲，然後到上主个聖殿敬拜。佢轉到王宮个時，吩咐人準備食物；飯菜一上桌，佢就食。
21佢个官員問佢：「𠊎等真毋明白：細人仔還生，你為佢禁食緊噭，細人仔一死，你反轉䟘起來啉食！」
22 大衛講：「著啊！細人仔還生，𠊎禁食緊噭；因為𠊎想，上主可能會憐憫𠊎，莫俾細人仔死掉。
23這下細人仔死掉，𠊎做麼介還愛禁食呢？𠊎會使細人仔返生係麼？有一日𠊎會到佢該位去，總係佢無法度轉到𠊎這位來！」
所羅門出世24 大衛安慰佢个𡜵娘拔示芭，㧯姖同房。姖後來𫱔一個孻仔；大衛㧯佢安名所羅門。上主惜這細人仔，
25吩咐先知拿單㧯這細人仔安名耶底底亞
，因為上主盡惜佢。大衛打下拉巴城(歷代志上 20:1-3)26 約押繼續攻打亞捫人个京城拉巴，差毋多會打下來。
27佢派人去向大衛報告：「𠊎攻打拉巴城，已經搶到水源頭，
28這下請國王召集其他个軍隊，親自帶領去攻打！𠊎無愛將打下這城个功勞歸𠊎自家。」
29所以大衛集中大軍，去攻擊拉巴，將城打下來。
30亞捫人个神像米勒公
有一頂金冕旒，大約重三十五公斤，有鑲寶石。大衛將寶石剝下來，鑲在自家个王冠頂 。佢也對城肚搶到盡多戰利品，31將該城个人民拉出來，強迫佢等用鋸仔、鐵耙、斧頭做工，又強迫佢等在磚窯工作 。大衛也共樣對待其他亞捫城市个人民。然後大衛㧯佢个大軍就轉耶路撒冷去。
Who We AreWhat We EelieveWhat We Do
2025 by iamachristian.org,Inc All rights reserved.
