傳道書 12 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1趕你還後生、衰老个日仔還吂到，

就係你講：「做人全無生趣」

該兜年日吂到以前，

愛記得創造你个主。

2日頭、光明、月光、星辰還吂變烏暗，

雨後个雲還吂倒轉來个時，

你愛記得佢。

3該時，掌屋个人會愊愊掣，

強壯个人也會變痀腰；

挨磨石个婦女減少致到停工，

對窗門看出去个會矇矇看毋清楚 。

4街路个門全部關等 ；

挨磨石个聲抑係細阿妹仔唱歌个聲緊來緊細聲。

總係屋簷鳥一出聲，人就醒。

5人毋敢上較高个所在，

也當驚路項个危險。

冷天杏樹開白花，

草蜢跳毋挺動 ，

人無半點性慾、全無辦法了。

逐儕全部緊來緊近永遠个家鄉，

該時，送葬个人會在街項來來去去。

6到該時，就像銀鍊仔挷斷掉，

金碗打爛掉，

泉水滣个水罌仔打爛掉，

天車也在井堘㧹爛掉，

7人个身體會歸還泥土，

靈魂會歸轉賜生命个上帝。

8傳道者 講：空虛，空虛，萬事全部係空虛。

9傳道者毋單淨自家有智慧，佢還繼續將智識教導人民。佢研究、考查並編集盡多箴言。

10傳道者尋出激勵人心个話，用心將事實寫下來。

11智慧人所講个話會責備、管教人，就像有竻个牧杖；佢等編集个箴言就像釘到𢫮𢫮个釘仔恁堅固，全部係大牧者上帝所賜个。

12後生人 啊，還有一件事你愛留意：寫書永遠寫毋會掉；書讀忒多，身體會當𤸁。

13𠊎个話全部講煞了，總講一句：愛敬畏上帝，謹守佢个命令，因為這係逐個人應該盡个義務。

14𠊎等所做个一切，無論好壞，連囥等無人知个事，上帝全部愛審判。