1上主个話臨到耶利米，
2喊佢去企在上主聖殿个門口，在該位宣佈講：「你等入這兜門去敬拜上主个猶大人啊，愛聽上主个話。
3上主 — 萬軍个元帥、以色列个上帝恁樣講：你等愛棄邪歸正！恁樣，𠊎就俾你等住在這垤土地。
4毋好再相信該兜騙人个話，講：『𠊎等當安全！這係上主个聖殿；這係上主个聖殿；這係上主个聖殿！』
5「你等斷真愛棄邪歸正，互相公平款待。
6毋好再欺負外族人、孤兒㧯寡婦；愛停止在這垤地上㓾無罪个人；毋好再拜別个神明，害到自家。
7若係你等正經棄邪歸正，𠊎就俾你等繼續住在這位，就係以前𠊎賜給你等祖先做永久產業个土地。
8「總講，你等偎靠該騙人个話係無利益个。
9你等做賊、㓾人、犯姦淫、發假誓、向巴力燒香，拜你等毋識个神明。
10你等做這一切𠊎當惱个事，然後來到𠊎个聖殿，企在𠊎面前，講：『𠊎等當安全！』
11你等將𠊎个聖殿看做賊竇係麼？𠊎清清楚楚看到你等个所行所做。
12你等到示羅
去，看𠊎頭擺所選个受人敬拜个地方，你等就知：𠊎因為吾子民以色列个罪樣般對付該所在。13你等犯這恁多个罪；𠊎 — 上主早就一直勸你等，總係你等毋聽；𠊎喊你等，總係你等毋應。
14所以，𠊎愛對付你等所倚靠、屬𠊎个聖殿，㧯𠊎賜給你等並你等祖先个所在，像𠊎以前對付示羅共樣。
15𠊎愛對𠊎面前將你等逐走，像𠊎以前逐走你等个兄弟以色列北國个人民 共樣。𠊎 — 上主恁樣宣佈了。」
人民違背命令16上主講：「耶利米啊，毋好為這兜人祈禱，也毋好為佢等大聲哀求。你毋好代佢等向𠊎懇求，因為𠊎一定毋聽。
17佢等在猶大个逐城市㧯在耶路撒冷个街項所做个事，你無看到係麼？
18佢等个子女撿柴，阿爸燒火，阿姆攪麵粉做餅，獻給佢等个天后女神。佢等也向別个神明獻酒，佻佻惹𠊎發譴。
19事實上，佢等傷到个敢係𠊎？佢等傷到个係佢等自家，害自家到盡見笑。
20所以，𠊎 — 至高个上主恁樣宣佈：𠊎愛將受氣拚在這地方，也愛拚在人、動物、樹仔、㧯五榖頂高。𠊎个大發譴像火當猛𤏸起來，毋會烏掉。」
21上主 — 萬軍个元帥、以色列个上帝恁樣講：「𠊎个子民啊，做你等將燒化祭㧯平安祭个肉拿去食掉。
22𠊎帶領你等个祖先出埃及个時，𠊎並無命令佢等獻燒化祭抑係其他祭物。
23𠊎只有命令佢等聽從𠊎；恁樣，𠊎就做佢等个上帝，佢等做𠊎个子民。𠊎愛佢等遵行𠊎个道路；恁樣，佢等就會萬事順利。
24總係，佢等毋聽從，也毋搭𠊎，反轉照自家硬頸邪惡个心去做，離開𠊎越來越遠。
25對你等祖先離開埃及該日開始直到這下，𠊎逐日一擺又一擺差派𠊎个僕人 — 眾先知向你等傳話，
26總係無人搭𠊎，也無人聽話。你等比你等个祖先還較硬頸，還較作惡。
27「所以，耶利米啊，你愛向𠊎个子民傳這兜話，雖然佢等毋會聽；你愛喊佢等，雖然佢等毋會應。
28總係你愛責備佢等：佢等个國家毋接受管教，毋聽從𠊎 — 上主、佢等个上帝。誠實 早就毋見掉了，連提也無人提！
在欣嫩子山壢个罪惡29「耶路撒冷人啊，
愛剃光頭那毛，將它㧒掉！
愛上光光个山頂去唱哀歌！
因為𠊎 — 上主已經豁掉惹𠊎受氣个子民了。
30上主講：「猶大人做一件𠊎看做盡惡个壞事。佢等將𠊎當惱个偶像放在𠊎个聖殿底背，打垃圾𠊎个聖所。
31佢等在欣嫩子山壢造陀斐特祭壇，將自家个子女放在頂高用火燒來獻祭。𠊎並無命令佢等獻這種祭，連想也無想過。
32所以，有一日，該所在毋會再喊做陀斐特抑係欣嫩子山壢，會喊做『㓾人个山壢』。人會在陀斐特埋葬身屍，因為已經無位所好埋了。
33天空个飛鳥㧯地上个野獸會來食身屍，無人來逐。
34𠊎愛使猶大逐隻城市㧯耶路撒冷个街項毋會再有歡喜快樂个聲，也毋會再有新郎㧯新娘个聲，因為這垤土地定著會荒掉。」
Who We AreWhat We EelieveWhat We Do
2025 by iamachristian.org,Inc All rights reserved.
