1 以色列全會眾透夜盡吵、開聲大噭。
2佢等埋怨摩西㧯亞倫講：「𠊎等死在埃及抑係死在這曠野還較贏！
3上主做麼介愛𢱋𠊎等到該地方去？𠊎等一定會被人㓾死，𠊎等个𡜵娘子女一定會被人捉走。𠊎等倒轉埃及去敢毋係較好？」
4佢等彼此講：「𠊎等來選一個領袖帶𠊎等轉去埃及！」
5 摩西㧯亞倫就伏在以色列全會眾面前；
6嫩个孻仔約書亞㧯耶孚尼个孻仔迦勒這兩個探仔悲傷到扯爛衫褲，
7對人民講：「𠊎等所打探个該垤土地係非常肥个土地。
8若係上主歡喜𠊎等，佢會𢱋𠊎等到該位，將該垤流乳㧯蜜、盡肥个土地賜給𠊎等。
9你等毋好悖逆上主，也毋使驚該地方个人民。𠊎等會盡容易征服佢等。上主㧯𠊎等同在；佢已經打贏該兜保護佢等个神明，所以你等毋使驚！」
10總係全會眾威脅佢等，愛用石頭打死佢兩儕。忽然，以色列人全部看到上主个榮光出現在聖帳篷頂高。
摩西為人民祈禱11上主對摩西講：「這兜人藐視𠊎愛到幾時呢？佢等毋相信𠊎愛到幾時呢？雖然𠊎在佢等當中行恁多神蹟，佢等還係毋信𠊎。
12𠊎愛使佢等發瘟來毀滅佢等，總係𠊎愛使你㧯你个子孫成做大國，比佢等較強大！」
13總係，摩西對上主講：「你用你个大能𢱋這兜人離開埃及。埃及人聽到你對你个子民所做个事以後，
14佢等會㧯這地方个人講。這地方个人已經聽講你 — 上主㧯𠊎等同在个消息。你个雲停在𠊎等頂高个時，你在𠊎等面前顯現。日時頭，你在雲柱肚𢱋𠊎等；暗晡時，你在火柱肚𢱋𠊎等。
15這下，若係你將你个子民㓾淨淨，該兜聽過你名聲个國家會講：
16『上主在曠野㓾掉佢个子民，因為佢無法度𢱋佢等進入佢所應許賜給佢等个土地去。』
17所以，主啊，𠊎這下求你顯出你个大能，實現你个應許。你識講過：
18『𠊎係上主；𠊎毋會隨便發譴。𠊎有豐盛个慈愛；𠊎赦免罪惡㧯過犯。總係，𠊎毋會將有罪个準做無罪，𠊎一定會因為爺𡟓个罪來責罰佢等个子女，直到三四代。』
19上主啊，求你照你偉大不變个慈愛赦免這兜人个罪，就像佢等對離開埃及以來你一直赦免佢等恁樣。」
20上主應講：「𠊎照你所求个赦免佢等。
21總係，𠊎指等𠊎个永生發誓：就像𠊎个榮光充滿全地恁確實，
22這兜人連一儕毋會入去該土地。佢等看過𠊎个榮光，看過𠊎在埃及㧯曠野所行个神蹟，還係連連試探𠊎，毋聽從𠊎。
23佢等一定做毋得進入𠊎所應許給佢等祖先个土地；藐視𠊎个人，無一儕做得入去。
24總係𠊎个僕人迦勒無㧯佢等共樣；佢一直對𠊎忠心，所以，𠊎會𢱋佢到該垤佢打探過个土地；佢个後代也會得到該地做產業。
25亞瑪力人㧯迦南人這下住在山壢，所以，天光日你等愛倒轉去，向紅海路上个曠野行。」
上主責罰埋怨佢个人民26上主對摩西㧯亞倫講：
27「這兜邪惡个人民埋怨𠊎愛到幾時呢？佢等个怪怨𠊎全部聽到了！
28你等去㧯佢等講：『𠊎指等𠊎个永生發誓：𠊎會照你等所求个對付你等。𠊎係上主；𠊎恁樣宣佈了。
29你等全部會死；你等个屍體會橫到這曠野。因為你等怪怨𠊎，你等當中二十歲以上个人，無一儕做得進入該地。
30𠊎識答應俾你等住在該位；總係除了耶孚尼个孻仔迦勒㧯嫩个孻仔約書亞，無一儕做得入去。
31你等恅到你等个子女會被人捉去，總係𠊎會𢱋佢等進入你等所棄絕个土地；該地會成做佢等个家鄉。
32論到你等，你等个屍體會橫在這曠野。
33你等个子女會為你等个毋信受責罰，在這曠野流浪四十年，直到你等全部死淨淨。
34你等會擔當自家个罪，一日算一年，你等打探該地四十日，就會受四十年个痛苦。恁樣，你等就知𠊎㧯你等越來越毋親了。
35𠊎發誓愛恁樣對付你這兜聚集起來悖逆𠊎个邪惡人民。你等每一儕全部會死在這曠野。𠊎係上主；𠊎恁樣宣佈了。』」
36-37 摩西派去打探該地个探仔轉來，傳出有關該地無確實个報告，害全會眾怪怨上主。所以上主使這兜人發瘟，佢等就死掉。
38十二個探仔只有嫩个孻仔約書亞㧯耶孚尼个孻仔迦勒無死。
第一擺進攻迦南(申命記 1:41-46)39 摩西將上主个話㧯以色列人講，佢等就盡悲哀。
40第二日打早，佢等出發進攻山區。佢等講：「𠊎等確實有犯罪；𠊎等這下愛上去上主應許𠊎等个地方。」
41總係摩西講：「你等這下做麼介毋聽從上主个話呢？你等一定毋會成功！
42毋好上去！上主毋㧯你等同在，你等會被仇敵打敗。
43你等堵到亞瑪力人㧯迦南人，一定會被佢等㓾死。上主毋㧯你等同在，因為你等離開佢，毋跈佢。」
44雖然上主个約櫃㧯摩西無離開營地，佢等還係強強上山去。
45所以，住在該山區个亞瑪力人㧯迦南人下來攻打佢等，打敗佢等，一直將佢等逐到何珥瑪。
Who We AreWhat We EelieveWhat We Do
2025 by iamachristian.org,Inc All rights reserved.
