1五旬節該日，信徒全部聚集在共一個地方。
2忽然有聲對天頂下來，像一陣大風吹過个聲，充滿佢等所坐个歸間屋。
3佢等又看到像火舌个形仔，分開，落在每一個人身上。
4佢等全部就被聖靈充滿，照聖靈所賜个才能講出別種个話。
5該時，有虔誠个猶太人對世界各國轉來，住在耶路撒冷。
6佢等一聽到這響聲，其中一大群人就來聚集。大家感覺盡奇怪，因為每一個人聽到信徒用佢在外國个腔口講話。
7佢等感覺非常希奇，彼此講：「你看，這兜講話个人敢毋係加利利人嗎？
8𠊎等逐儕樣般聽到佢等講𫣆自家个阿姆話呢？
9𠊎等當中有帕提亞人、米底亞人、以攔人；還有對美索不達米亞、猶太、加帕多家、本都、亞細亞、
10弗呂家、旁非利亞、埃及，㧯古利奈附近个利比亞一帶地方來个人；也有對羅馬來个，
11包含猶太人㧯信猶太教个外邦人；另外有克里特人㧯阿拉伯人。無想到，𠊎等全部聽到佢等用𫣆在外國講个話，來傳上帝偉大个作為！」
12佢等攏總感覺又希奇又迷惑，彼此問講：「這到底係麼介意思呢？」
13總係，有兜人笑信徒講：「這兜人係酒食忒多了！」
彼得講个道理14這時，彼得㧯其他十一個使徒企起來。佢大聲對大家講：「猶太同胞㧯所有住在耶路撒冷个人啊，你等愛知，注意聽𠊎講。
15你等恅到這兜人係食酒醉嗎？毋係，因為這下正朝晨頭九點鐘。
16這個現象就係先知約珥所講个：
17上帝講：
這係𠊎在世界末期所愛做个：
𠊎愛將𠊎个靈倒給所有个人。
你等个子女會宣告𠊎个信息 ；
你等个後生人會看到異象；
你等个老人家會發奇妙个夢。
18在該兜日仔當中，
𠊎愛將𠊎个靈倒出來，
甚至給𠊎个僕人㧯使女；
佢等會宣告𠊎个信息。
19𠊎愛在天頂顯神蹟，
在地上行奇事；
有血，有火，有大濛煙；
20日頭卻毋會發光；
月光會像血恁紅；
在主偉大光榮个日仔來到以前，
這一切全部會發生。
21到該時，
凡求喊主名个人一定得救。
22「以色列同胞啊，你等愛聽𠊎个話。拿撒勒人耶穌个神聖使命，因為上帝通過佢所行个神蹟、大能、奇事，已經盡清楚對你等顯明出來。這事你等自家知，因為係發生在你等當中个。
23上帝照自家个旨意㧯先見，早就決定將耶穌交給你等；你等就通過不法个人將佢釘在十字架頂，害死佢。
24總係上帝使佢對死復活，除掉死个痛苦，因為死不能控制佢。
25大衛識講到佢：
𠊎看到主常常在𠊎面前；
因為佢在𠊎个塍頭，𠊎就毋會搖動。
26所以，𠊎个心肝歡喜，
𠊎个話滿有快樂。
雖然𠊎个肉體會死，
𠊎還會生在希望中。
27因為你毋會俾𠊎落陰間，
也毋會俾你忠心个僕人糜掉。
28你已經指示𠊎生命个路；
你个同在會使𠊎充滿歡喜。
29「各位兄弟，關係先祖大衛个事，𠊎老實㧯你等講。佢毋單淨死掉，也埋掉去；佢个墳墓到今晡日還保存在𠊎等這位。
30佢既然係先知，就知上帝對佢个應許：上帝識發誓愛對佢个子孫中設立一個王來坐佢个寶座。
31大衛預先知上帝个計劃，所以論到關係基督个復活，佢講：
佢無被人㧒落陰間；
佢个肉體也無糜掉。
32這個耶穌，上帝已經使佢復活；𠊎等全部係這件事个見證人。
33佢已經高升到上帝个右片，並對厥爸接受所應許个聖靈。你等這下所看到所聽到个，就係佢所倒給𠊎等个恩賜 。
34大衛自家並無上到天頂去，總係佢講：
主對𠊎个主講：
你坐在𠊎个右片，
35等𠊎使你个仇敵伏在你个腳下。
36「所以，以色列个全體同胞啊，你等確實愛知，你等釘在十字架頂這個耶穌，上帝已經設立佢做主，做基督！」
37大家聽到這個話，感覺盡刺心，就對彼得㧯其他个使徒講：「兄弟啊，𠊎等愛樣般正好呢？」
38 彼得㧯佢等講：「你等每一個人愛離開罪惡，又愛奉耶穌基督个名領洗禮，好俾你等个罪得到赦免，你等就會得到上帝所賜个聖靈。
39因為上帝个應許係愛給𠊎等个主上帝所呼召个人，就係你等、你等个子女，㧯一切在遠方个人。」
40 彼得又用盡多話對佢等做見證，勸佢等講：「你等愛救自家脫離這腐敗个世代！」
41盡多人接受佢个話，並領洗禮；該日，信徒約增加三千人。
42佢等專心對使徒領受教訓，參加團契生活，分享愛个筵席，共下祈禱。
團契个生活43使徒行盡多神蹟奇事；眾人就非常欽服。
44全體信徒繼續共下過團契个生活，所有个東西大家公用。
45佢等又賣田產家業，照逐儕个需要將錢分給大家。
46佢等同心合意，逐日在聖殿聚會，又在逐儕个屋下分享愛个筵席，用歡喜純潔个心共下食飯，
47頌讚上帝，㧯每一個人保持和睦个關係。主使得救个人數逐日增加。
Who We AreWhat We EelieveWhat We Do
2025 by iamachristian.org,Inc All rights reserved.
