1上主 — 全能个上帝出聲講話，
對日出到日落之地發出呼喊。
2對該十分靚个鍚安城，
上帝个榮光射等出來。
3𠊎等个上帝愛降臨，
毋係恬恬無出聲。
佢个頭前有烈火；
佢个周圍有暴風。
4佢愛傳天地做證人，
來審判自家个子民。
5佢講：「召集𠊎忠心个子民來𠊎這位，
就係該兜用牲儀來同𠊎立約个人。」
6諸天宣佈上帝係公義个；
上帝佢自家就係審判者。
7上帝講：
「𠊎个子民啊，聽好，𠊎愛講；
以色列啊，𠊎愛控告你。
𠊎係上帝，就係你个上帝。
8𠊎責備你，毋係因為你个牲儀，
也毋係因為你一直獻个燒化祭。
9𠊎無需要你牛欄肚个公牛，
也無欠用你羊圈肚个山羊；
10因為樹林中个獸類攏總屬𠊎；
千山頂个頭牲也全部係𠊎个。
11山中所有个飛鳥係屬𠊎；
平地一切个動物係𠊎个。
12「就算𠊎有肚飢个時，𠊎也毋使㧯你講，
因為，世界㧯其中个一切全部係𠊎个。
13敢講𠊎愛食公牛个肉？
敢講𠊎愛啉山羊个血？
14你愛用感謝做祭物獻給上帝 ；
你愛對至高者還你所許个願。
15患難臨到个時節，你愛求𠊎；
𠊎會拯救你，你也愛榮光𠊎。」
16總係，上帝對作惡个人講：
「你有麼介權利好背誦𠊎个誡命？
你係麼介人，樣敢談論𠊎个約啊？
17你惱𠊎个管教；
你拒絕𠊎个話。
18你堵到賊仔就同佢做伴；
你也同人共下去犯姦淫。
19「你由在你个嘴去講壞話；
你个舌乸也時常講花撩。
20你隨便譭謗弟兄，
尋親兄弟个毛病。
21你做這兜事，𠊎恬恬無出聲，
你就恅到𠊎同你共樣，係麼？
其實𠊎這下愛責備你，
將你个罪擺在你面前。
22「你等毋記得𠊎个人啊，愛聽清楚，
免得𠊎將你等扯裂，無人好救你等。
23用感謝做祭物个人，就係尊崇𠊎；
照正路來行个，𠊎一定會拯救佢。」
Who We AreWhat We EelieveWhat We Do
2025 by iamachristian.org,Inc All rights reserved.
