箴言 4 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

愛尋求智慧

1孻仔啊，愛聽阿爸个教訓；

你等愛專心來得到聰明。

2𠊎給你等个教訓攏總係好个，

所以，你等毋好偏離𠊎个教示。

3𠊎在阿爸面前係孝子，

在阿姆眼中係得人惜个單丁子；

4該時，吾爸就教𠊎講：

「你个心愛記得𠊎个話；

愛遵守𠊎个誡命，

你就會有豐富个生命。

5愛尋求智慧，愛追求聰明；

莫毋記得抑係違背𠊎个話。

6莫離開智慧，姖會保護你；

你惜姖，姖一定會保守你。

7智慧係最重要个，所以愛尋求智慧 ；

你愛用你所有个一切來得到聰明。

8你看重智慧，智慧就會使你高升；

你揇等智慧，姖就會使你有尊榮。

9智慧會將靚帽仔戴在你頭那頂，

將光榮个冕旒送給你。」

愛行智慧个道

10孻仔啊，聽𠊎講，接受𠊎个話，

你就會享受長壽。

11𠊎已經教你行智慧个道，

已經帶領你行正直个路。

12你行个時，步步順利；

你走个時，毋會跌倒。

13愛穩穩捉住教訓，毋好放掉姖；

愛謹守姖，因為姖係你个生命。

14毋好行邪惡人个道；

也毋好踏壞人个路。

15愛閃開，做毋得經過！

愛轉身離開，閃過去！

16壞人無做兜壞事，就睡毋落覺；

佢等若無害人跌倒，就睡毋得；

17因為邪惡係佢等食个飯，

殘暴係佢等啉个酒。

18義人个路像打早个光，

緊來緊光，直到當晝頭。

19邪惡人个道像暗晡頭个烏暗；

佢等跌倒，還毋知被麼介逕倒。

20孻仔啊，愛注意聽𠊎个話，

愛側耳聽𠊎个教訓。

21莫俾它兜對若面前閃走，

愛一直記在你个心肝肚；

22因為尋到它兜个，就係得到生命，

全身也會得到醫治。

23你愛謹慎你个心思超過一切；

因為生命个泉源係對心湧出。

24愛除掉彎曲个話，

愛遠離花撩个嘴。

25你个目珠愛單單向前看；

你个目珠愛直直看頭前。

26愛修平 你个腳所行个路，

你所做个一切就會穩當。

27毋好向左或向右偏走；

愛使你个腳遠離邪惡。