1上主吩咐摩西
2向以色列人講：「以下係𠊎 — 上主所定个節期；在節期內，你等愛宣佈舉行聖會，來敬拜上主。
安息日3「一禮拜你等有六日好做事，總係第七日係神聖个安息日，你等一定愛歇睏。這日，你等麼介事就毋好做，愛聚集敬拜。無論你等住在㖠位，安息日係上主个。
𨃟過節㧯除酵節(民數記 28:16-25)4「以下係上主个節期，在這兜日仔當中你等愛宣佈舉行聖會。
5每年正月十四，對臨暗仔開始就係上主个𨃟過節。
6正月十五開始就係向上主守个除酵節；七日內，你等愛食無酵餅。
7這節期个第一日，你等愛聚集敬拜上主，日常一切个工作都毋好做。
8在這七日內逐日愛向上主獻火祭。第七日，你等愛再聚集敬拜上主，日常一切个工作都毋好做。」
新收成个五榖9上主吩咐摩西
10向以色列人講：「進入𠊎 — 上主所賜給你等个土地以後，逐擺收割，你等愛拿最先收割个一捆五榖到祭司該位；
11佢愛將這一捆在上主面前搖幾下，使你等得到上主个接納。祭司愛在安息日个第二日將這綑搖幾下。
12搖這綑五榖該日，你等愛將一隻無缺點一歲大个綿羊牯獻給上主做燒化祭；
13同時愛獻兩公斤攪橄欖油个幼麵粉做素祭，將它燒獻做清香个禮物獻給上主，也愛獻一公升个祭酒。
14新收成个五榖，無論係生个、焙熟个，抑係焙做餅个，愛等到你等向上帝獻祭物後正做得食。你等个後代，無論住在㖠位，愛永遠遵守這條例。
五旬收割節(民數記 28:26-31)15「愛對安息日个第二日，就係你等獻一捆五榖做搖祭給上主該日算起，你等愛算滿七禮拜。
16到第五十日，就係第七個安息日个第二日，你等愛將新收成个五榖做素祭獻給上主。
17逐家愛帶來兩垤餅，獻給上主做搖祭。逐垤餅愛用兩公斤幼麵粉加發粉來焙，做新收成个祭物獻給上主。
18除了餅，你等愛獻七隻一歲大、無缺點个綿羊牯、一隻細牛牯，㧯兩隻綿羊牯。這兜頭牲愛㧯素祭㧯祭酒共下做燒化祭獻給上主。牲儀个香氣係上主所歡喜个。
19你等也愛獻一隻山羊牯做贖罪祭，兩隻一歲大个綿羊牯做平安祭。
20祭司愛將餅㧯兩隻綿羊牯做搖祭，在上主面前搖幾下，然後歸給該兜祭司；這兜祭物係聖个。
21該日，你等愛聚集敬拜上主，日常一切个工作都毋好做。你等个後代，無論住在㖠位，愛永遠遵守這條例。
22「收割个時，你等做毋得割田堘个五榖，也做毋得回頭拈跌下个榖串；愛將這兜留給窮苦人㧯暫住个旅客。𠊎係上主 — 你等个上帝。」
新年(民數記 29:1-6)23上主吩咐摩西
24向以色列人講：「你等逐年愛守七月初一做特別个安息日；愛歕羊角做紀念，大家聚集來敬拜上主。
25你等日常一切个工作都毋好做；愛向上主獻火祭。」
贖罪日(民數記 29:7-11)26上主對摩西講：
27「逐年七月初十係贖罪日。該日，你等愛禁食、刻苦自家，愛聚集敬拜上主，向佢獻火祭。
28該日，麼介事都毋好做，因為係贖罪日，愛在上主 — 你等个上帝面前行贖罪禮。
29無論麼人，若在該日無禁食、無刻苦自家，就愛對上帝个子民中除掉。
30無論麼人，若在該日做麼介事，𠊎 — 上主愛親自對子民中將佢除掉。
31你等麼介事都毋好做。你等个後代，無論住在㖠位，愛永遠遵守這條例。
32對七月初九个臨暗仔到第二日臨暗仔，你等愛守這日做特別个安息日，愛在這站期間禁食、刻苦自家。」
搭寮仔節(民數記 29:12-40)33上主吩咐摩西
34向以色列人講：「七月十五係搭寮仔節，愛連等七日向上主守這節。
35搭寮仔節个頭一日，你等愛聚集敬拜上主，日常一切个工作都毋好做。
36在七日內，你等愛逐日向上主獻火祭；第八日，愛再聚集敬拜上主，向佢獻火祭。這係嚴肅个集會，你等日常一切个工作都毋好做。
37(「以上所列个日仔係上主所定个節期。你等愛聚集敬拜上主，逐日按照條例向佢獻火祭、燒化祭、素祭、頭牲祭㧯祭酒。
38除了上主所定个安息日，你等還愛守這兜節期；除了照常个牲儀、還願祭、㧯甘心祭，你等還愛向上主獻這兜牲儀。)
39「收割完成以後，你等愛對七月十五開始守上主个節期七日。第一日係特別个安息日；第八日也係特別个安息日。
40第一日，你等愛拿果樹所結盡好个果子、棕樹枝、茂盛个樹枝、㧯柳樹桍，在上主 — 你等个上帝面前歡喜慶祝七日。
41逐年七月，你等愛向上主慶祝這節期七日。你等愛世世代代遵守這條例。
42所有以色列人全部愛在寮仔底背住七日，
43使你等个後代知𠊎𢱋以色列人出埃及以後，識使佢等住在寮仔底背。𠊎係上主 — 你等个上帝。」
44恁樣，摩西就向以色列人宣佈上主所定个節期个條例。
Who We AreWhat We EelieveWhat We Do
2025 by iamachristian.org,Inc All rights reserved.
