約伯記 35 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1 以利戶又對約伯講：

2你緊講在上帝面前無麼介罪；

你恅到自家恁樣講有理係麼？

3你問上帝：「𠊎个罪㧯你有麼介關係？

𠊎若無犯罪有麼介好處？」

4𠊎這下愛回答你，

也回答你該兜朋友。

5你昂頭看天，

看你頭那頂个雲有幾高。

6你若係犯罪，對上帝有麼介影響？

就算你緊犯罪，敢會傷害到佢麼？

7就算你公正，對上帝有麼介幫助？

你做个好事，敢對佢有利益係麼？

8你个罪只有害到㧯你共樣个人類受苦；

你个好行為也只有俾世間人得到利益。

9人受到壓迫个時，就緊哀求；

佢等被人欺負，就去求幫助。

10總係無人講：「創造𠊎个上帝在㖠位？

佢使𠊎在暗晡時還會唱歌。

11上帝教導𠊎等，賜給𠊎等智慧，

遠遠超過所有个飛鳥㧯走獸。」

12佢等哀求，總係上帝無應，

因為佢這兜壞人盡驕傲。

13佢等虛假个求喊無效果，

上帝毋聽，全能者也毋插。

14 約伯啊，何況你講你看毋到上帝；

你个案仔擺在佢面前，愛耐心等。

15你恅到上帝毋會責罰；

你認為佢毋會插罪惡。

16你講恁樣个話無搭無碓，

講恁多，毋知自家講麼介。