以賽亞書 18 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上帝愛責罰古實

1唉！古實个河壩該片有一垤地，在該位會聽到擛翼胛个響聲。

2外交使者坐等蒲草船，對該位順等尼羅河下來。你這兜使者愛遽遽帶信息轉你等个老屋去！就係河壩分開个地方，人民又高大又皮膚光滑，全世界人所驚个該隻強大个國家。

3地上所有个人民啊，愛注意看山頂升起个大旗！愛注意聽羊角个響聲！

4上主對𠊎講：「𠊎愛恬恬對天頂看下來，就像收成時節个露水，又像熱天个大日頭。

5葡萄收成以前，花謝掉、葡萄差毋多會熟个時，仇敵愛來攻打古實，像用禾鐮割葡萄藤恁容易。

6佢等士兵个屍體全部橫在外背，給飛鳥野獸做食物；飛鳥歸隻熱天有好食，野獸還有好食到過冬。」

7到該時，該隻河壩分開个地方，全世界人所驚个該隻強大个國家，它該兜又高大又皮膚光滑个人民愛向上主 — 萬軍个元帥獻禮物。佢等愛到錫安山，就係敬拜上主 — 萬軍个元帥个地方。