詩篇 16 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

信靠个祈禱 大衛所刻个詩 。

1上帝啊，求你保護𠊎，

因為𠊎倚靠你。

2𠊎對上主講：「你係𠊎个主；

你係𠊎一切福氣个源頭。」

3上主忠心个子民係樣般个高貴啊！

同佢等共下係𠊎最歡喜个事。

4服事別个神明个人，

反轉惹到無限个災禍；

𠊎一定無愛參加佢等个獻祭，

一定毋拜佢等个神明。

5上主啊，你係𠊎个產業、𠊎个福杯；

𠊎个命運在你个手中。

6你用索仔量給𠊎个田全部係好田；

𠊎係樣般合意你所賜个產業！

7𠊎頌讚上主，因為佢指導𠊎，

暗晡時，𠊎个良心也提醒𠊎。

8𠊎常常有上主在𠊎面前；

因為佢在𠊎个塍頭，𠊎就毋會搖動。

9所以，𠊎个心歡喜，𠊎个靈快樂；

𠊎个身體安然自在；

10因為你毋會俾𠊎落陰間，

也毋會俾你忠心个僕人下陰府。

11你會指示𠊎生命个路。

在你面前𠊎有滿足个喜樂；

在你右手𠊎有永遠个幸福。