約書亞記 18 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

其他土地个分配

1 以色列人民征服這垤土地以後，全體人民聚集在示羅，搭上主个聖帳篷。

2以色列人還有七個支族吂得到佢等應得个土地。

3所以約書亞對以色列人講：「你等愛等幾久正入去佔領上主 — 你等祖先个上帝所賜給你等个土地呢？

4這下，逐支族愛選三個人到𠊎這位來；𠊎愛派佢等去歸隻地區查看。佢等愛將應得个地區畫好地圖，然後轉來見𠊎。

5這垤土地愛分做七份；猶大還係保有佢南方个土地，約瑟保有佢北方个土地。

6你等愛將這七個地區个地圖帶來給𠊎；𠊎愛在這地方為你等抽籤，求問上主 — 𠊎等个上帝。

7利未人做毋得分到土地，因為做上主个祭司，事奉佢，就係佢等个產業。迦得、呂便㧯東瑪拿西支族，佢等已經得到約旦河東片个土地了；該係上主个僕人摩西分給佢等个。」

8這兜人起身去查看地形，畫地圖。約書亞吩咐佢等，講：「你等愛行遍歸隻地區，地圖畫好，帶轉來給𠊎。𠊎愛在示羅這地方為你等抽籤，求問上主。」

9所以佢等行遍歸隻地區，將地分做七份，寫下各城鎮个名稱，然後轉到示羅營地見約書亞。

10約書亞就在示羅為佢等抽籤，求問上主，將各支族應得个土地分給佢等。

便雅憫支族分到个土地

11第一籤係分配給便雅憫支族該兜家族个土地。佢等个土地在猶大㧯約瑟支族中間。

12北片个地界對約旦河到耶利哥以北个山排，向西經過山區，直到伯‧亞文曠野，

13又對該位透到路斯南片个山排 (路斯就係伯特利)，向南到亞他錄‧亞達，到下伯‧和崙南片个山。

14地界對這位轉向另一個方向，對山个西片向南，到猶大支族个城 — 基列‧巴力 (就係基列‧耶琳)。這係西片个地界。

15南片个地界對基列‧耶琳个邊堘開始，到 尼弗多亞泉水，

16然後下到欣嫩子山壢對面个山腳，就係在利乏音山壢个北端。地界對這位向南經過欣嫩山壢，耶布斯山嶺个南片，到隱‧羅結，

17然後轉向北，到隱‧示麥，再到亞都冥路口對面个基利綠，又到波罕石 (波罕係呂便个孻仔)，

18經過山个北片，該位看約旦河谷，然後向下直到山壢底，

19經過伯‧曷拉个北片，到約旦河入死海个地方為止。這係南片个地界。

20約旦河係東片个地界。以上个土地係便雅憫支族該兜家族所分到个產業。

21屬便雅憫支族該兜家族个城有：耶利哥、伯‧曷拉、伊麥基悉、

22伯‧亞拉巴、洗瑪臉、伯特利、

23亞文、巴拉、俄弗拉、

24基法‧阿摩尼、俄弗尼㧯迦巴，總共十二座城，㧯附近个村莊。

25另外有基遍、拉瑪、比錄、

26米斯巴、基非拉、摩撒、

27利堅、伊利比勒、他拉拉、

28洗拉、以利弗、耶布斯 (就係耶路撒冷)、基比亞㧯基列‧耶琳，總共十四座城，㧯附近个村莊。以上係便雅憫支族該兜家族所分到个產業。