以西結書 24 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

生鹵个鑊頭

1𠊎等被人捉去个第九年十月初十，上主㧯𠊎講話。

2佢講：「人子啊，你愛將今晡日這日仔記下來，因為今晡日巴比倫王開始圍攻耶路撒冷。

3你愛向𠊎悖逆个子民講這比喻。愛㧯佢等講，𠊎 — 至高个上主恁樣講：

將鑊頭放在火頂高，

鑊頭肚愛裝水。

4將上等个腳髀肉、肩頭肉放落鑊頭肚，

將特選个骨頭也放落鑊頭，放到滿滿。

5將最好个羊肉放落鑊頭肚，

鑊頭下愛堆滿柴；

將水燒滾來煮骨頭㧯肉。」

6至高个上主恁樣講：「充滿流人血个城會堵到災難了。這座城像無洗過、生鹵个鑊頭，底背个肉愛一垤一垤隨便挾出來，一垤也無留。

7這城有㓾人流血个事，血倒在光光个大石頂，毋係倒在有泥粉好壅个地上。

8將血倒在無法度壅个大石頂有𠊎个旨意；這血跡惹𠊎發譴，要求𠊎報仇。」

9所以，至高个上主恁樣講：「充滿流人血个城會堵到災難了！𠊎愛親身來堆柴。

10愛添柴、撥火、煮肉，將湯煮燥，連骨頭也燒到臭火燒！

11-12然後愛將拚淨个銅鑊頭放在火炭火頂高燒到紅紅，雖然銅鹵無法度完全燒掉，總係鑊頭就淨浰了。

13耶路撒冷啊，你放蕩个生活將自家打垃圾。雖然𠊎識設法使你淨浰，總係你還係恁屙糟。等到𠊎將大發譴拚在你身上以前，你就無可能再淨浰了。

14𠊎 — 上主恁樣宣佈了。𠊎愛採取行動个時節到了。𠊎絕對毋會毋插你个罪過；𠊎的確毋會憐憫，也毋後悔。你愛因為你个所行所做受責罰。」至高个上主恁樣宣佈了。

先知个𡜵娘死掉

15上主㧯𠊎講話；

16佢講：「人子啊，𠊎愛忽然間將你最惜个人搶走。你毋好哀傷、大聲噭，毋好流目汁。

17毋好俾人聽到為死人悲傷大噭个聲。還愛照常頭巾著等鞋。毋好幪面，也毋好食別人為喪家預備个食物。」

18該日朝晨，𠊎㧯人民講起這個事；該暗晡，𠊎个𡜵娘就死掉。第二日，𠊎照上主个命令去做。

19人問𠊎：「你恁樣做係愛㧯𠊎等講麼介呢？」

20𠊎㧯佢等講：「上主㧯𠊎講話；

21佢愛𠊎向你等以色列人傳講這信息。至高个上主恁樣講：『你等將聖殿準做驕傲个力量，目珠所歡喜个㧯心靈所關心个；總係𠊎愛侮辱𠊎个聖殿。你等留在耶路撒冷个子女全部會被人㓾掉。』

22該時，你等愛照𠊎 — 以西結所做个去做。你等毋好幪面，也毋好食別人為喪家預備个食物，

23你等个頭那愛纏頭巾，腳愛著鞋，毋好悲傷，毋使噭。你等愛因為自家个罪滿面憂愁，面對面緊透大氣，衰弱來死。

24𠊎 — 以西結就係你等事先看到个兆頭；𠊎所做个，你等全部愛照恁樣做。上主講，到該時，你等就會知佢係至高个上主。」

25上主講：「人子啊，𠊎愛搶走佢等个城堡 — 佢等所誇口、目珠所歡喜、心靈所關心个聖殿。𠊎也愛搶走佢等个子女。

26該時，脫離災難个人會來向你說明當時个情形。

27該日，你毋會像啞口；你會開嘴向佢講話。恁樣，你愛做佢等个兆頭，佢等就會知𠊎係上主。」