1上主膏油設立波斯王塞魯士，揀選佢做皇帝。
上主指派佢佔領列國，派佢去減少該兜王个權力。
上主愛列國為塞魯士大開城門，毋會再關起來。
上主對佢恁樣講：
2𠊎愛親自為你開路，
為你削平大細山岡。
𠊎愛攻破銅門，
斬斷鐵閂。
3𠊎愛將暗中囥等个寶物、
倉庫囤等个財富全部賜給你；
𠊎愛你知𠊎係上主，
也知以色列个上帝指名呼召你。
4𠊎指定你幫助𠊎个僕人雅各，
扶持𠊎所揀選个以色列。
𠊎指名呼召你；
你雖然毋認識𠊎、𠊎還係愛賜你名號。
5𠊎係上主，獨一無二个；
𠊎以外無別个上帝。
雖然你毋認識𠊎，
𠊎還係愛賜你力量。
6𠊎恁樣做，係愛使普天下，
對日出到日落之地个人，全部知：
𠊎以外無別个神；
𠊎係上主，獨一無二个。
7𠊎造光明，也造烏暗；
𠊎降福，也降禍。
𠊎係上主；這一切係𠊎做个。
8𠊎使公義像甘霖對天降下，
大地就裂開來承接，
開出自由㧯正義个花。
𠊎係上主；𠊎愛使這個事實現。
創造㧯歷史个主9㧯創造主對抗个人慘了！
缶仔敢做得㧯造它个師傅辯論？
泥敢做得問師傅愛將它做成麼介？
它敢做得怪怨師傅个手藝毋高明嗎？
10敢有人向爺𡟓抗議講：
「做麼介將𠊎𫱔做恁樣？」
這種人慘了！
11上主 — 以色列神聖个上帝、
就係掌管未來个創造主恁樣講：
無人有權問𠊎子女个事，
無人有權管𠊎愛做麼介！
12𠊎親自創造這個大地；
𠊎創造地上个人類。
𠊎親手展開天空，
𠊎管理日、月、星辰。
13𠊎照公義使波斯王塞魯士興起；
𠊎愛修直佢行个路。
𠊎愛佢重建𠊎个城市耶路撒冷，
幫助𠊎該兜被人捉去个子民得到自由。
佢做這事毋係為工錢，也毋係為獎賞。
上主 — 萬軍个元帥恁樣宣佈了。
14上主對以色列恁樣講：
埃及㧯古實个財產全部會歸你；
高大个西巴人會做你个奴才，
帶等鎖鍊跈在你後背。
佢等會跪在你面前承認講：
上帝斷真㧯你同在，並無別个神；
佢以外無別个上帝。
15該拯救以色列人民个上帝，
係將自家囥起來个上帝。
16製造偶像个人會澇潰了；
佢等全部會堵到見笑、羞辱了。
17總係以色列蒙上主拯救；
佢等會得到永久个救恩，
永遠毋會見笑。
18上主創造天；
只有佢係上帝。
佢造大地，
堅固它个根基。
佢無愛俾地荒掉，
就使它成做有人住个地方。
佢講：𠊎係上主，並無別个。
19𠊎毋係囥等、在烏暗个地方講話；
𠊎並無喊以色列人民在渺渺茫茫中尋𠊎个旨意。
𠊎係上主；
𠊎講真理；𠊎傳揚公義。
世界个主㧯巴比倫个偶像20上主講：
共下來啊！
對列國逃轉來个人全部來！
該兜扛等偶像在街路遊行、
向毋會救佢等个神明祈禱个，
全部係無智識个人！
21由在被告个人共下參詳，
到法庭來說明！
係麼人早就預言會發生个事？
毋係𠊎 — 上主嗎？
𠊎以外，並無上帝；
𠊎係公正、拯救个上帝，
𠊎以外無別个神。
22全世界个人啊，
你等歸向𠊎就會得救。
𠊎係上帝，以外無別个神。
23𠊎講話實在，
𠊎个應許毋會廢掉。
𠊎指等自家來發誓：
逐儕愛跪落去拜𠊎；
大家愛發誓對𠊎盡忠。
24佢等會講，
只有上主有公義㧯力量，
所以人愛歸向上主；
恨佢个人全部會見笑。
25所有以色列个子孫會因為上主得到拯救，
大大歡喜。
Who We AreWhat We EelieveWhat We Do
2025 by iamachristian.org,Inc All rights reserved.
