1上主講：
嘴燥个人啊，全部來！
這位有水好啉！
無錢个人啊，也做得來！
來買東西食！
毋使錢，毋使代價，
來買酒㧯乳！
2做麼介了錢去買食毋得个東西？
做麼介打喪勞碌賺來个工錢，還係得毋到飽足？
愛留意聽從𠊎个話，
你等就會享受最好个食物，
使你等心靈得到飽足、滿有歡喜。
3𠊎个子民啊，愛聽𠊎个話，到𠊎這位來。
注意聽𠊎个話，你等就會得生命！
𠊎愛㧯你等立永遠个約，
將𠊎應許給大衛該可靠不變个慈愛賜給你等。
4看啊，𠊎已經立佢向萬民做𠊎个見證，
設立佢做萬國个領袖㧯元帥。
5你定著會召集你毋識个列國，
該毋識你个列國會來投靠你。
𠊎 — 上主、你等个上帝愛成就這事；
因為以色列神聖个上帝已經賜給你光榮。
6愛在還尋得到上主个時去尋佢；
愛在上主還親近个時去求佢。
7壞人愛離開邪惡个道路；
犯罪个人愛回心轉意。
佢等應該轉向上主，來承受佢个憐憫；
愛歸向𠊎等个上帝，因為佢愛施行大赦免。
8上主講：𠊎个想法毋係你等个想法；
𠊎个道路毋係你等个道路。
9就像天比地高加盡多，
𠊎个道路比你等个道路高加盡多；
𠊎个想法比你等个想法高加盡多。
10像雪㧯雨對天頂落下來，
並無倒轉天頂去，係愛滋潤大地，
使五榖發芽生長，
俾委種个有種子，
俾人有五榖好食，
11𠊎个話就係恁樣。
𠊎講出个話絕對毋會空空倒轉來，
一定會成就𠊎个計劃，
達成𠊎所頒佈个旨意。
12你等會歡歡喜喜出來，
平平安安被上帝引導 。
你等行過大山細山，
它兜會歡喜唱歌；
你等行過田野，
連樹仔也盡命拍手！
13原旦生竻仔个所在這下變做生松柏；
原旦生蒺藜个所在這下變做生石榴。
這愛做永遠不能除掉个記號，
來紀念𠊎 — 上主个聖名。
Who We AreWhat We EelieveWhat We Do
2025 by iamachristian.org,Inc All rights reserved.
