以弗所書 6 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

爺𡟓㧯子女个關係

1做子女个，你等愛在主个底背聽從爺𡟓；這係理所當然个。

2-3「愛孝敬爺𡟓，你就會事事順利，在世間享受長壽！」這係第一條帶應許个誡命。

4做阿爸个，毋好惹你等个子女發譴；愛用主个教訓㧯警戒來養育佢等。

主僕个關係

5做奴僕个，你等愛用敬畏个心，驚驚轆轆、誠誠實實來服從世間个主人，像事奉基督一樣；

6毋好單淨在人看等你个時正恁樣做，像係愛俾人歡喜定定；你等愛像係做基督个僕人，誠心遵行上帝个旨意一樣。

7你等愛甘心樂意盡做奴僕个本份，像係服事主，毋係服事人。

8愛知，無論係奴僕抑係自由人，主愛照逐儕个好行為來報答佢。

9做主人个，你等也愛好好對待奴僕，毋好威脅佢等。愛知，你等㧯你等个奴僕同屬一位在天頂个主；佢用共樣个標準對待每一個人。

上帝所賜个全副軍裝

10最後，你等愛倚靠主㧯佢个大能大力做堅強个人。

11你等愛著上帝所賜个全副軍裝，使你等企得住，來抵擋魔鬼个詭計。

12因為𠊎等毋係同有血有肉个人對抗；係同天界个邪靈，就係這烏暗世代个執政者、掌權者，㧯宇宙間邪惡个勢力戰爭。

13因為恁樣，你等愛用上帝所賜个全副軍裝來裝備自家，好在邪惡个日仔抵擋敵人个攻擊，拚到底，企在在。

14所以，你等愛企穩。愛用真理做腰帶繫腰，用正義做護心鏡遮胸，

15隨時準備宣揚和平个福音，像著等鞋一樣。

16愛常常擎等信心个盾牌，來抵擋該邪惡者射過來一切个火箭。

17愛用救恩做頭盔，用上帝个話做聖靈所賜个寶劍。

18你等愛順從聖靈个帶領隨時祈禱，求上帝幫助你等；愛警醒祈禱，毋好停。你等愛常常為眾聖徒祈禱；

19也愛為𠊎祈禱，求上帝賜𠊎真道，使𠊎好膽開嘴講明福音个奧秘。

20為到做福音个大使，𠊎卻被人用鎖鍊紽等。你等愛求主賜𠊎勇氣，大膽講應當講个話。

問候㧯祝福

21𠊎等所親愛、忠心事奉主个兄弟推基古，佢會將一切關係𠊎个事情㧯你等講，俾你等知𠊎个情形。

22𠊎特別派佢去你等該位，係愛報你等知𠊎等這位个情形，使你等得到鼓勵。

23願阿爸上帝㧯主耶穌基督賜平安、仁愛，㧯信心給你等各位兄弟姊妹！

24願上帝个恩典永遠㧯所有敬愛𠊎等主耶穌基督个人同在！