1𠊎个阿妹，𠊎个新娘，
𠊎入到𠊎个園中，
摘沒藥㧯香料，
食𠊎个蜂房㧯蜂糖，
啉𠊎个酒㧯乳。
(耶路撒冷个細妹仔)愛人哪，食啊！啉啊！
直到你等醉在愛情中！
第四首(新娘)2𠊎雖然睡等，總係心還無睡；
𠊎聽到𠊎个情郎搉門：
(新郎)𠊎个阿妹，㧯𠊎開門啊，
𠊎完美个情妹，𠊎个月鴿仔啊！
𠊎滿頭那露水；
頭那毛被暗晡時个露水打濕了。
(新娘)3𠊎已經脫衫了，
樣愛𠊎䟘起來著轉去呢？
𠊎个腳已經洗淨浰囉，
樣好過打垃圾呢？
4𠊎个情郎對門縫伸手入來，
𠊎个心就搏搏跳。
5𠊎䟘起來開門俾情郎入來；
𠊎揢等門閂，
𠊎个雙手有沒藥流下來，
沒藥汁對手指頭滴等下。
6𠊎為𠊎个情郎開門，
總係佢已經走掉去了。
看毋到佢，𠊎無葛無煞 ！
𠊎緊尋佢，總係尋毋到；
𠊎緊喊佢，總係佢無應。
7城肚巡邏掌更个人堵到𠊎；
佢等就打𠊎，將𠊎打到著傷；
掌城牆个將𠊎个外衫搶走。
8 耶路撒冷个細妹仔啊，請答應𠊎！
若係你等看到𠊎个情郎，
請㧯佢講，𠊎發相思病了。
(耶路撒冷个細妹仔)9你這在細妹仔當中最靚个啊，
你个情郎比別人个敢有較好？
佢到底有麼介特別个所在呢？
𠊎等樣般愛答應你个要求呢？
(新娘)10𠊎个情郎緣投又健康，
在萬人中無人比抑得。
11佢个頭那像純金；
佢个頭那毛像波浪，
像烏鴉恁烏。
12佢个目珠像溪水滣个月鴿仔，
在乳汁當中洗身，企在溪水滣。
13佢个面頰卵像歸廂个香花，
也像歸臺个香草。
佢个嘴唇像百合花，
滴下沒藥汁。
14佢个雙手像金仔做个管仔，
鑲等寶石。
佢个身體像光滑个象牙，
鑲等藍寶石。
15佢个雙腳像白玉柱，
安在純金个座臺頂。
佢个外貌像黎巴嫩山恁雄壯，
也像香柏樹恁竳線。
16佢个嘴唚起來盡甜；
佢實在當得人惜噢！
耶路撒冷个細妹仔啊，
佢就係𠊎个情郎，𠊎个朋友！
Who We AreWhat We EelieveWhat We Do
2025 by iamachristian.org,Inc All rights reserved.
