以賽亞書 11 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

新个王㧯和平个國

1對耶西个樹頭愛發出嫩芽；

有一個新王愛對佢个後代興起來 。

2上主个靈愛降在佢个身上，

給佢有智慧㧯聰明，

給佢有策略㧯能力，

給佢有智識㧯敬畏上主个心。

3敬畏上主係佢所歡喜个：

佢毋會照外貌來審判；

佢毋會聽風聲來斷案。

4佢愛照公當審判窮苦人；

佢愛保護卑微人个權利。

佢愛下令刑罰犯罪个人；

佢愛將邪惡个人處死刑。

5佢愛用公義統治人民；

佢愛用信實對待佢等。

6豺狼㧯細綿羊會共下住；

豹仔㧯細山羊共下睡。

細牛仔㧯細獅仔共下食乳 ；

細人仔也做得掌牠兜。

7牛乸㧯熊乸共下食東西；

連牛子㧯熊子會共下睡。

獅仔也會像牛共樣食草。

8食乳个孲𤘅仔做得在毒蛇个窿堘搞；

斷乳个細人仔手伸入蛇窿肚也無事。

9在錫安 — 上帝个聖山頂，

這一切毋會有傷害，也毋會有邪惡；

就像大海充滿海水，

世界會充滿對上主个認識。

賸到个人會轉來

10到該日，耶西个後代會有一個新王興起 。佢定著會成做列國个大旗；萬民會來歸向佢；佢个京城會有大榮光。

11到該日，主愛再一擺用佢个權柄使佢流亡个子民賸到个轉家鄉；佢等會對亞述㧯埃及，對巴特羅、古實、以攔、巴比倫、哈馬㧯沿海逐海島轉來。

12上主愛向列國搖大旗，將分散在四面八方个以色列人㧯猶大人聚集起來，帶佢等轉到故鄉。

13以色列毋會再嫉妒猶大；猶大也毋會再看以色列做仇敵。

14佢等會聯合起來，攻擊西片个非利士人，去搶東片个人。佢等會佔領以東㧯摩押；亞捫人會降服佢等。

15上主愛吹燥埃及个海；佢愛用熱風吹燥幼發拉底河，使大河分做七條細河，俾人做得著鞋行過去。

16會有一條盡平个大路俾該兜賸到在亞述个以色列人行轉來，就像以色列人个祖先對埃及出來該日一樣。