1 非利士人召集軍兵在猶大个梭哥城，準備相㓾。佢等安營在梭哥㧯亞西加中間个以弗‧大憫。
2同時掃羅㧯以色列人聚集，在以拉山壢安營，在該位準備㧯非利士人相㓾。
3非利士人企在一個山頂，以色列人企在另外一個山頂，中央隔等一個山壢。
4有一個迦特城个人，名安到歌利亞，對非利士營出來，向以色列人挑戰。這個人高差毋多三 公尺，
5著等有銅鱗片个戰甲，大約五十七公斤重，頭戴銅盔，
6腳髀也用銅甲保護等。佢个肩頭揹等一支銅做个短槍。
7佢个手拿等長槍，槍柄像織布機个車心恁粗，槍頭就有七公斤重。有一個兵，拿等佢个盾牌，在佢頭前開路。
8歌利亞企等，向以色列人个軍隊喊講：「你等在該位做麼介？擺陣想愛相㓾係麼？𠊎係非利士人；你等係掃羅个奴才！選一儕人出來㧯𠊎打看仔！
9若係佢打贏，㓾掉𠊎，𠊎等就做你等个奴才；若係𠊎贏了，㓾掉佢，你等就做𠊎等个奴才服事𠊎等。」
10該非利士人又講：「今晡日𠊎向以色列軍隊挑戰！你等敢派人出來㧯𠊎打麼！」
11掃羅㧯以色列軍隊聽到非利士人這兜話全部盡驚。
大衛在掃羅个軍營12 大衛係猶大个伯利恆城以法他人耶西个孻仔。耶西有八個孻仔。掃羅做王个時，耶西已經盡老了。
13耶西三個大孻仔跈掃羅去相㓾：最大个安到以利押，第二個安到亞比拿達，第三個安到沙瑪。
14大衛係最細个孻仔。這三個阿哥㧯掃羅共下个時，
15大衛有時在掃羅該位，有時轉伯利恆代阿爸掌羊。
16該非利士人逐朝晨逐暗晡出來熻以色列人來相㓾；恁樣有四十日久。
17有一日，耶西對厥孻仔大衛講：「帶十公斤焙好个麥串㧯十隻餅，去軍營看若三個阿哥！
18你將這十垤牛乳餅送給指揮官。去看你該兜阿哥个情況，又愛帶一樣東西轉來，證明你有看到佢等，佢等一切平安。
19掃羅、你三個阿哥㧯所有以色列个軍隊，全部在以拉山壢㧯非利士人相㓾。」
20第二日，大衛打早䟘起來，將羊群交給別人掌，然後照耶西个吩咐帶等食物出發。佢到軍營个時，以色列人堵好出去戰場、大聲喊、準備作戰；
21非利士人㧯以色列人个軍隊面對面擺陣好勢。
22大衛將食物留在補給官該位，走到軍隊頭前尋厥哥，問佢等个情形樣般。
23佢㧯厥哥當講等話个時，迦特城个非利士人歌利亞走過來，像以前恁樣熻以色列人來相㓾；大衛全部有聽到。
24以色列人一看到歌利亞，就驚到遽遽走開。
25過去，佢等傳話講：「你看該隻人！你聽，佢在該盡罵以色列人！王講，㓾死歌利亞个人會得到盡多財產做獎賞，王个妹仔也愛嫁給佢，厥爸个家族也毋使納稅。」
26 大衛問佢堘頭个人講：「若有人㓾死該非利士人，除掉以色列个羞辱，佢會得到麼介獎賞？到底該無受割禮个非利士人係麼人？樣敢藐視永生上帝个軍隊！」
27佢等就照先前个話㧯大衛講，㓾死歌利亞个人會得到麼介獎賞。
28 大衛个大哥以利押聽到大衛㧯該兜人講話，就當無歡喜，對大衛講：「你來這位做麼介？麼人代你在野地掌該幾隻羊？你這個鬼靈精！恁驕傲，存心不良！你走來這看人相㓾係麼！」
29 大衛講：「𠊎做毋著麼介呢？敢講𠊎問看仔也做毋得？」
30大衛又去問另外一儕共樣个問題。佢逐擺問，得到个回答攏總共樣。
31有人聽到大衛問个話，就去㧯掃羅講；掃羅就喊大衛來。
32大衛對掃羅講：「𠊎等大家毋使驚該非利士人！若僕人就會去㧯佢拚！」
33 掃羅應講：「做毋得，你樣般會打得佢贏呢？你係一個細人仔，佢係一個對細就相㓾到大个軍人！」
34 大衛對掃羅講：「若僕人係為阿爸掌羊个。有時獅仔抑係熊會來，捉走細羊仔，
35𠊎就逐牠、打牠、救轉該隻細羊。若係牠攻擊𠊎，𠊎就揪牠个鬚，將牠打死。
36若僕人識打死獅仔㧯熊，𠊎共樣有辦法㓾死該無受割禮、藐視永生上帝軍隊个非利士人。
37上主識救𠊎脫離獅仔㧯熊个爪，佢也會救𠊎脫離該非利士人个手。」
掃羅對大衛講：「好！你去啊！願上主㧯你共下。」
38掃羅就將佢自家个戰甲給大衛著 — 有一頂銅盔㧯一領有鱗片个戰甲。佢將銅盔戴在大衛頭那頂。
39大衛將掃羅个刀仔繫在戰甲邊，想愛行，總係無辦法行，因為佢無習慣著這兜。佢對掃羅講：「𠊎無辦法著這兜東西去相㓾，𠊎著毋慣。」佢就將戰甲全部脫掉。
40大衛拿等佢掌羊个柺棍仔，又對河壩滣拈五粒光滑个石仔放在掌羊人用个袋仔肚，然後拿拂石仔个索仔出去面對該非利士人。
大衛打贏歌利亞41該非利士人開始向大衛行等過來，代佢拿盾牌个人行在佢頭前。
42非利士人看清楚大衛个時，就藐視佢，因為大衛係一個面色紅潤、斯文个細人仔定定。
43佢問大衛：「該支柺棍仔係做麼介用个？你將𠊎看做一隻狗仔係麼？」所以佢指自家个神明咒詛大衛，侮辱大衛，講：
44「來啊！𠊎愛將你个屍體豁給飛鳥㧯野獸食！」
45 大衛應講：「你來㓾𠊎，係用刀仔、長槍㧯短槍，總係𠊎㓾你係奉上主 — 萬軍元帥个名；佢就係你所藐視个以色列軍隊个上帝。
46今晡日，上主愛將你交在𠊎手中。𠊎愛打贏你，剁下你个頭那。𠊎愛將非利士軍隊个屍體豁給飛鳥㧯野獸食。恁樣，普天下就會知以色列有一位上帝；
47在這位逐個人也全部會知上主無需要用刀仔抑係槍來拯救佢个子民。因為戰爭个輸贏全看上主；佢愛將你等交在𠊎等个手中。」
48 歌利亞緊行緊近大衛；大衛遽遽向非利士人陣前走等去。
49佢伸手對袋肚拿出一粒石仔，用索仔將石仔向歌利亞拂過去。石仔打到歌利亞个額頭，打爛佢个頭那殼，歌利亞就橫下去伏等。
50恁樣，大衛無用刀仔，只用拂石仔个索仔㧯一粒石仔就將歌利亞打橫。
51大衛走過去，踏在歌利亞身上，將歌利亞个刀仔對刀鞘肚挷出來，㓾死佢、剁下佢个頭那。
非利士人看到佢等个英雄死掉，就全部逃走。
52以色列㧯猶大个軍隊在後背大聲盡喊、盡㓾，一直追到迦特
㧯以革倫个城門。在沙拉音該條路上，死傷个非利士人滿遍係，直到迦特㧯以革倫。53以色列人追殺非利士人轉來以後，就搶非利士人个營地。
54大衛帶等歌利亞个頭那到耶路撒冷，將歌利亞个武器留在佢自家个帳篷肚。
掃羅召見大衛55 掃羅看大衛去打歌利亞，就問佢个元帥押尼珥講：「押尼珥，該後生人係麼人个孻仔？」
押尼珥應佢：「國王，𠊎發誓講，𠊎毋知。」
56王講：「你去查看仔該後生人係麼人个孻仔！」
57 大衛㓾掉歌利亞轉到軍營以後，押尼珥帶佢去見掃羅，大衛還拿等歌利亞个頭那。
58掃羅問佢：「後生人，你係麼人个孻仔？」
大衛應講：「𠊎係若僕人伯利恆人耶西个孻仔。」
Who We AreWhat We EelieveWhat We Do
2025 by iamachristian.org,Inc All rights reserved.
