1上主啊，𠊎愛一心一意感謝你；
𠊎愛傳揚你一切奇妙个作為。
2𠊎愛因為你來歡喜快樂；
至高者啊，𠊎愛歌頌你个名！
3你一顯現，𠊎个仇敵就退走；
在你面前，佢等就橫下滅亡。
4你坐在寶座上，照公義來審判；
你為𠊎伸冤，為𠊎个案件辯護。
5你責備列邦，消滅邪惡个人；
你拭掉佢等个名，直到永遠。
6𠊎个仇敵已經滅淨淨了；
佢等个城市被你毀滅掉；
也無人再過紀念佢等了。
7總係，上主愛掌權到永遠；
佢已經為審判設立佢个寶座。
8佢用公義審判世界；
佢照公平統治萬民。
9上主係受壓迫个人个避難所，
係佢急難時逃難个城堡。
10上主啊，認識你个人愛倚靠你，
因為你毋識棄絕該兜尋求你个人。
11愛頌讚在錫安掌權个上主！
愛在萬國中間傳揚佢个作為！
12上帝紀念苦難中个人；
佢無毋記得佢等个哀求，
愛責罰迫害佢等个人。
13上主啊，求你憐憫𠊎！
你看，怨恨𠊎个人樣般迫害𠊎！
上主啊，求你對死門挷𠊎上來，
14使𠊎企在鍚安城个門口，
對人講起𠊎頌讚你个一切，
又因為你个拯救歡喜快樂。
15外邦人陷在自家挖个坑肚，
腳被自家所設个羅網纏到。
16上主通過公正个審判彰顯佢自家；
壞人被自家个手所做个纏到死死。
17壞人㧯所有毋搭上帝个外邦人，
佢等全部愛落陰間。
18窮苦人，上帝一定毋會永遠毋記得佢等；
受迫害个，佢等个心願也毋會一直落空。
19上主啊，䟘起來，莫俾世間人贏過你！
求你帶外邦人到你面前，審判佢等。
20上主啊，使佢等大大著驚；
俾佢等知自家係人定定！
Who We AreWhat We EelieveWhat We Do
2025 by iamachristian.org,Inc All rights reserved.
