約書亞記 11 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

約書亞打贏北片个王

1 以色列打贏个消息傳到夏瑣王耶賓个耳公，佢就派人傳話給瑪頓王約巴、伸崙王、押煞王，

2㧯北片山區、加利利湖南片个約旦河谷、高原、㧯多珥附近海滣該兜王。

3佢也派人傳話給約旦河滣兩片个迦南人，又給亞摩利人、赫人、比利洗人，㧯山區个耶布斯人，㧯住在黑門山山下米斯巴地个希未人。

4這兜王帶領佢等所有个軍隊共下來，人數多到像海滣个沙仔。佢等有當多戰馬㧯戰車。

5這兜王聯合起來，在米倫溪共下安營，愛㧯以色列人相㓾。

6上主對約書亞講：「你毋使驚佢等；天光日這時節，𠊎愛俾佢等死在以色列人个手中。你愛斬斷佢等戰馬个腳，燒掉佢等个戰車。」

7所以約書亞帶領佢所有个軍隊，忽然出現在米倫溪去攻擊佢等。

8上主將佢等交在以色列人手中。以色列人追殺佢等，向北到米斯利弗‧瑪音㧯西頓大城，向東到米斯巴山壢，直到將敵人㓾淨淨。

9約書亞照上主所命令个去行，斬斷佢等戰馬个腳，燒掉佢等个戰車。

10然後，約書亞倒轉來攻打夏瑣，㓾死夏瑣王。 (該時夏瑣在這兜國家當中係最強大个。)

11以色列人㓾死該城所有个人，將佢等滅掉，無留一個，又放火將夏瑣城燒掉。

12 約書亞佔領這兜君王个城市，將這兜王捉起來，將所有个人㓾死，就像上主个僕人摩西所命令个。

13除了夏瑣城被約書亞燒掉以外，以色列人並無燒掉其他起在山岡頂个城市。

14以色列人將這兜城肚所有財物㧯頭牲全部搶走，將所有个人㓾淨淨，無留一個。

15上主樣般命令佢个僕人摩西，摩西也照樣命令約書亞；約書亞就照恁樣去做。上主命令摩西个逐件事，約書亞無一件無遵行。

約書亞佔領个土地

16 約書亞佔領這一帶所有个土地，包含北方㧯南方个山區㧯高原，歌珊全地㧯南方燥地，㧯約旦河谷。

17-18歸隻地區个範圍，南片對以東附近个哈拉山起，北片到黑門山南部黎巴嫩山壢个巴力‧迦得為止。約書亞㧯這一帶地區所有个王相㓾當久，到最尾佢正捉到佢等，將佢等㓾死。

19只有住在基遍城个希未人㧯以色列人講和；其他个城全部被以色列人征服了。

20因為上主个意思係愛使該兜城个人硬心，來㧯以色列作對，恁樣佢等正會全部受毀滅、被人㓾死，無機會得到憐憫，就像上主命令摩西个。

21該時，約書亞毀滅住在山區當大漢个民族亞衲人。這族个人住在希伯崙、底璧、亞拿伯，並猶大㧯以色列个山區。約書亞徹底毀滅佢等㧯佢等个城。

22以色列境內無留一個亞衲族人，只有在迦薩、迦特㧯亞實突還有賸兜仔。

23恁樣，約書亞照上主命令摩西个話征服這一帶地區。佢將地分給以色列人，逐支族有一份做產業。

所以，全地太平，無戰爭。