1上主對摩西講：
2「你愛因米甸人欺騙以色列人來刑罰佢等；你做這事以後就會轉到若祖宗該位。」
3所以摩西對人民講：「你等愛預備相㓾，去攻打米甸人，為上主報仇。
4以色列逐支族愛派出一千人參加戰爭。」
5所以，逐支族選出一千人，參加戰爭个人數總共一萬兩千人。
6摩西就派逐支族个一千人去相㓾，又派祭司以利亞撒个孻仔非尼哈做佢等个元帥；非尼哈帶等聖所个用品㧯歕戰爭警報个喇叭。
7佢等遵照上主給摩西个命令攻打米甸人，㓾掉佢等所有个壯丁，
8包含米甸个五個王 — 以未、利金、蘇珥、戶珥、利巴。佢等也㓾死比珥个孻仔巴蘭。
9 以色列人捉米甸人个婦人家㧯細人仔，搶佢等个牛羊㧯佢等所有个財寶，
10燒掉佢等所住个城㧯所有个營地。
11佢等將搶來个戰利品，連人㧯頭牲全部帶走，
12帶到佢等在耶利哥對岸約旦河滣摩押平原个營地，交給摩西、祭司以利亞撒，㧯以色列全會眾。
部隊轉來13 摩西、祭司以利亞撒，㧯所有其他領袖全部出營去迎接軍隊。
14摩西對該兜戰場轉來个軍官㧯指揮官發譴，
15問佢等講：「你等做麼介留這兜婦人家个命？
16愛知，就係這兜婦人家聽巴蘭个話，在批珥引誘以色列人悖逆上主，害上主个子民發瘟。
17這下，你等愛㓾掉所有个細阿哥仔、以及識㧯男人有性關係个婦人家，
18總係做得為你等自家留下所有个細阿妹仔㧯人家女。
19你等當中有㓾死人个，抑係憑到屍體个，愛留在營外七日。在第三日㧯第七日，你等愛潔淨自家㧯你等捉來个人，
20也愛潔淨所有布仔、皮仔、山羊毛㧯樹仔做个東西。」
21祭司以利亞撒對該兜相㓾轉來个人講：「上主給摩西个條例係恁樣：
22-23所有燒毋壞个東西，像金、銀、銅、鐵、錫、鉛，愛用火燒淨浰，另外也愛用水潔淨；其他會燒壞个東西，愛用水洗淨。
24第七日，你等一定愛潔淨自家个衫褲，恁樣你等就算淨浰，做得進入營帳。」
分戰利品25上主對摩西講：
26「你㧯祭司以利亞撒，並會眾个各族長愛將搶來个戰利品，連人帶頭牲全部點算一下，
27然後平均分做兩半，一半給軍隊，另外一半給其他个會眾。
28分給軍隊个一半中愛留下五百分之一做獻給上主个供物，就係逐五百個捉到个人中留下一儕；牛、驢、綿羊、山羊也全部恁樣。
29將這兜交給祭司以利亞撒做獻給上主特別个供物。
30分給人民个一半中，無論係捉到个人、牛、驢、綿羊、山羊、各樣頭牲，愛拿出五十分之一給管理上主聖帳篷个利未人。」
31摩西㧯祭司以利亞撒就照上主个命令去做。
32除了士兵自家留下个財物，佢等搶過來个戰利品有：羊六十七萬五千隻，
33牛七萬兩千隻，
34驢六萬一千隻，
35人家女三萬兩千人。
36相㓾个軍隊得到个一半有：羊三十三萬七千五百隻，
37其中六百七十五隻係獻給上主个供物；
38牛三萬六千隻，其中七十二隻係獻給上主个供物；
39驢三萬零五百隻，其中六十一隻係獻給上主个供物；
40人家女一萬六千人，其中三十二人歸給上主。
41摩西遵照上主个命令將戰利品交給祭司以利亞撒做獻給上主特別个供物。
42會眾得到个一半㧯軍隊得到个共樣：
43羊三十三萬七千五百隻，
44牛三萬六千隻，
45驢三萬零五百隻，
46人家女一萬六千人。
47摩西對會眾个一半中，連人帶頭牲，拿出五十分之一來，照上主个命令交給管理上主聖帳篷个利未人。
48該兜帶領軍隊个軍官㧯指揮官去見摩西，
49對佢講：「𠊎等係你个僕人，𠊎等已經點算屬下个士兵，一個就無少。
50所以𠊎等將逐儕搶來个金器、手鈪、手髀鈪、禁指、耳環、脖鍊，帶來獻給上主，做𠊎等生命个贖價，希望上主保佑𠊎等。」
51摩西㧯祭司以利亞撒接受這兜金仔，全部係手工當幼个金器。
52該兜軍官㧯指揮官獻給上主个金仔大約有兩百公斤。
53一般个士兵攏總將搶來个戰利品留給自家。
54摩西㧯祭司以利亞撒接受軍官㧯指揮官个金仔以後，就帶到聖帳篷，祈求上主保佑以色列人。
Who We AreWhat We EelieveWhat We Do
2025 by iamachristian.org,Inc All rights reserved.
