啟示錄 15 - 現代台語譯本漢字版(TTVH)-闽南语

天使及最後的災禍

1後來，我閣看見佇天頂有另外一個大閣奇異的景象出現，有七個天使掌管最後七個災禍，因為上帝欲降諸個災禍，將伊的受氣摒到盡。

2我閣看見親像有火摻佇內面的玻璃海，嘛看見許個得勝的人，𪜶已經贏過彼隻獸、獸的像，及代表獸的名字的數字。𪜶徛佇玻璃海頂面，手提上帝互𪜶的豎琴。

3𪜶唱上帝的僕人摩西的歌及羊羔的歌，講：

全能的主上帝，

你的作為大閣奇異；

萬王的王，

你的道路公義真實。

4主啊，什麼人敢無敬畏你，

敢無榮光你的名？

因為只有你是聖；

萬國攏會來，

佇你的面前敬拜你；

因為你公義的作為已經顯明。

5我閣看見天頂的聖殿已經開，內面有下見證的會幕。

6掌管七個災禍的七個天使對聖殿出來，穿清氣閣光亮的幼麻布的衫，胸坎縖金帶。

7四個活物的一個將七個金碗交互彼七個天使，內面貯滿永永遠遠活啲的上帝的受氣。

8聖殿內充滿對上帝的榮光及權能淐出來的煙，一直到七個天使所掌管彼七個災禍結束以前，無人會當進入聖殿。