何西阿書 7 - 現代台語譯本漢字版(TTVH)-闽南语

1我想欲醫好以色列的時，

以法蓮的罪過露現，

撒馬利亞的罪惡暴露，

因為𪜶做代誌虛假，

侵入厝內偷提，

佇外面公然搶劫。

2𪜶無想講我會記得𪜶一切的罪惡；

𪜶所犯的罪惡給𪜶纏牢牢，

我攏看現現。

3上主講：

𪜶做歹，互君王歡喜；

𪜶欺騙，互官員快樂。

4𪜶攏行淫亂，親像炎熱的火爐，

啲聽候麵丸發起來，

烘餅的人毋免閣撈火互焰。

5佇咱的王喜慶的日，

官員飲烈酒，醉甲毋知人，

王及背叛者握手。

6𪜶造反的心親像火爐，

歸暝勻勻仔𤏸，天一下光就爆發。

7𪜶心狂火熱，

給統治者一個一個消滅；

君王攏倒落去，

毋拘無人求叫我。

8 以法蓮及外族摻插；

𪜶是無反旁的餅。

9外族人給𪜶的氣力𠲿焦去，𪜶攏毋知；

𪜶已經發白頭毛，家己嘛毋知。

10 以色列的驕傲證明𪜶家己有罪；

雖然抵著諸個事，

𪜶猶久毋歸向上主 — 𪜶的上帝，

嘛無尋求伊。

11 以法蓮親像粉鳥戇戇毋識半項；

𪜶連鞭求叫埃及，連鞭去倚亞述。

12𪜶去投靠的時，我欲用網拋佇𪜶頂面，

親像啲掠空中的鳥，給𪜶網落來；

我欲照𪜶的歹行為給𪜶刑罰。

13𪜶慘啊，因為𪜶離開我。

𪜶會受毀滅，因為𪜶背叛我。

我欲解救𪜶，毋拘𪜶瞞騙我，拒絕我。

14𪜶無誠心對我祈求，

干焦佇眠床頂哀哀叫；

𪜶聚集敬拜，祈求五穀及新酒，

其實是啲背叛我。

15我鍛鍊𪜶，互𪜶手骨有力；

𪜶竟然圖謀歹代反抗我。

16𪜶一直去拜別個神明，毋歸向至高者；

𪜶親像冗去的弓無路用；

𪜶的首領講話驕傲侮慢，會死佇刀下；

此個事會成做埃及人的笑柄。