1天下萬項事攏有伊的期；
事事攏有伊的時：
2生有時，死有時；
栽種有時，摳所栽種的有時；
3刣有時，醫好有時；
拆毀有時，起造有時；
4哭有時，笑有時；
哀傷有時，跳舞有時；
5同房有時，分房有時；
親熱有時，冷淡有時；
6抄尋有時，失落有時；
保存有時，放拺有時；
7拆有時，補有時；
靜靜有時，講話有時；
8疼有時，怨有時；
戰爭有時，和平有時。
9作工的人對伊所勞碌拍拼的有得著什麼？
10我有看見上帝互世間人背重擔，互𪜶𣍐當清閒。
11上帝互伊所造的一切合𪜶的時，攏真好；閣將永遠此個觀念下佇人的心；毋拘上帝對頭到尾所做的，人𣍐當了解。
12我知人活啲上好是快樂閣做好事。
13人嘛食嘛飲，享受伊拍拼得著的，佇伊一切所勞碌的來享福，這嘛是上帝所賜。
14我知上帝所做的一切攏會留到永遠，𣍐加添，𣍐減少。上帝按呢做，是欲互人佇伊的面前心存敬畏。
15現在有的以前已經有；將來欲有的早已經有；過去的代誌上帝會閣互伊發生。
世間的無公平16我閣看著日光的下面，佇審判的所在有邪惡，佇公義的所在嘛有邪惡。
17我心內講：上帝欲平平審判義人及歹人，因為逐項代誌、逐項行為攏有伊一定的時。
18我心內講：關係世間人，上帝欲試驗𪜶，互𪜶知𪜶不過及牲生仝款。
19因為世間人的命運及牲生的命運攏像款；此個死，彼個嘛死，攏像款只有一口氣；人無比牲生較好，這攏是空虛。
20𪜶攏去到仝一個所在；攏對土粉出，嘛攏歸土粉。
21啥人知人的性命上頂面，獸的性命落地下？
22所以，人上好是會當享受家己所拍拼的成果，因為這是伊的報賞。死後的代誌，啥人會當互伊看著？
Who We AreWhat We EelieveWhat We Do
2025 by iamachristian.org,Inc All rights reserved.
