詩篇 52 - 現代台語譯本漢字版(TTVH)-闽南语

以東人多益來報掃羅講：大闢有去亞希米勒的家。彼時大闢做此首教示的詩，交互聖樂長。上帝的審判及恩惠

1有權力的人啊，是按怎你歸日為著做歹代啲誇口？

上帝的慈愛永遠存續。

2你製造是非圖謀毀壞；

你的舌真利，親像剃頭刀。

3你愛歹贏過好，

愛白賊贏過講義理。

4欺騙的人啊，

你愛講一切吞食人的話。

5上帝會掠你，對布棚給你拖出來，

對活人的地給你拔起來。

伊會永遠給你毀滅。

6義的人看著會驚畏，

恥笑你，講：

7「你看咧，這就是無倚靠上帝，

只有倚靠家己財富的人；

伊倚靠的反轉致到家己毀滅。」

8毋拘我，親像上帝殿內青翠的橄欖樹，

欲永永遠遠倚靠上帝的慈愛。

9因為你按呢對待我，我欲永遠感謝你。

我欲佇你聖的子民面前仰望你的名；

因為你的名真好。