哥林多後書 6 - 現代台語譯本漢字版(TTVH)-闽南语

1阮作上帝的同工的閣給恁苦勸，恁對上帝領受的恩典毋通互伊落空。

2因為上帝講：

佇通受接納的時，我有聽你；

佇拯救的日，我有幫贊你。

著聽！此陣是受接納的時；今仔日是拯救的日！

3為著阮侍奉的工作免受指責，阻礙別人的代誌阮攏無做，

4反轉用上大的耐心，凡事通過患難、艱難，及困苦，表示阮是上帝的差用。

5阮曾受著鞭拍、關監、暴力的傷害、勞苦、無睏、無食。

6阮用純潔、智識、寬容、仁慈，倚靠聖神，用純真的疼，

7傳真理的信息及上帝的大能力，用公義做武器攻擊對敵，保護家己。

8阮受尊重，嘛受侮辱；得著歹名聲，嘛得著好名聲。阮互人看做諞仙仔，其實阮講實話；

9若準無人識，其實人人攏識；若準死去，其實猶啲活。阮雖然受刑罰，毋拘無互人刣死；

10雖然憂傷，毋拘不時歡喜；雖然散赤，毋拘互真多人好額；親像無半項，毋拘逐項攏有。

11 哥林多的朋友，阮的心胸已經拍開，開嘴給恁講啦。

12毋是阮對恁無度量，是恁對阮肚腸狹。

13我看恁做家己的子給恁講：及阮像款，恁的心胸嘛著拍較開咧。

14毋通及未信的人牽連交插；公義及不法有什麼關聯？光明及烏暗哪會當交往？

15基督及魔鬼哪會當和合？信及無信的人有什麼關係？

16上帝的殿及偶像哪會當排做夥？因為咱是永活上帝的殿！照上帝所講：

我欲及我的子民做夥徛起，

佇𪜶中間往來。

我欲做𪜶的上帝，

𪜶欲做我的子民。

17所以主講：

恁著對𪜶中間出去，

及𪜶分離。

無清氣的毋通接觸，

按呢我就接納恁。

18我欲做恁的父，

恁欲做我的子、查某子。

全能的主有按呢講。