1彼個看起來親像人的閣講：「米底亞的大流士作王元年，我有起來協助米迦勒，互伊堅強。
2現在我欲將確實的事給伊講。」
南方的王及北方的王「波斯會有四個王。第四個王比以前的王較富足，閣因為伊的富足變做強盛，就煽動逐國攻擊希臘。
3「希臘會有一個勇猛的王掌握大權，照伊的意思統治國家。
4伊的權勢真強盛的時，伊的天下就分裂，毋拘伊的後代攏無人繼承；分裂出來的國家無親像伊有赫大的權力。伊的帝國會消滅，統治權互外人得去。
5「南方的王會強起來，毋拘伊的將軍中間會有一個比伊較強盛，掌握真大的權力。
6幾若年後，南方及北方兩國欲結盟，南方的王會將查某子嫁互北方的王，毋拘南方的公主的影響力維持無偌久，王的勢力嘛擋無偌久。南方的公主及侍候伊的人、伊的子，以及扶助伊的人，攏會受殺害。
7毋拘公主的後頭有一個起來作王。伊會導軍隊攻打北方的堡壘，得著勝利；
8閣將北方的神明、鑄的神像，以及金器、銀器攏帶轉去埃及；幾若年無閣攻擊北方的王。
9後來北方的王會侵入南方的領土，然後才撤退倒去北方伊的本國。
10「北方的王的子會召集大隊軍兵，準備戰爭；其中一個子會親像大水氾濫，衝擊南方。後來，伊會閣去進攻，攻破南方的堡壘。
11南方的王非常受氣，出來排陣交戰，將北方的大軍拍敗。
12南方的王拍敗對敵，掠真多人，就驕傲自高。伊雖然刣死歸萬人，毋拘伊的勝利維持無偌久。
13「北方的王會導比以前閣較多的軍兵出去交戰；幾年後，伊會導強大、裝備優良的軍隊來。
14彼時，會有真多人起來攻擊南方的國。你同胞中間的暴力份子嘛會背叛南方的王，互異象實現，毋拘𪜶會失敗。
15北方的王會閣來造土堆，攻打防備真堅固的城，南方的軍隊抵當𣍐牢，連特選的軍隊嘛無法度防守。
16來攻擊南方的，會出在伊家己的意思做事，無人會當反抗。伊會佔領彼個肥媠的地，完全控制彼個地。
17「為著欲推翻南方的國，伊決定用全國的力量征服南方，就先及南方定和平條約，將家己的查某子嫁互南方的王，欲用按呢推翻南方。毋拘伊的計策𣍐成功，家己嘛𣍐得著利益。
18後來伊就改變主意，攻取真多沿海島嶼。毋拘有一個外國的將軍欲阻止北方的王的壓霸，給伊拍敗，互伊受侮辱。
19了後，伊會撤退倒去本國堅固的城，毋拘會互人刣死，就永遠消失。
20「以後會有一個人續接北方的王位。為著欲增加王國的財富，彼個人會派官員佇全國剝削。過無偌久，此個王死去；毋是因為決鬥死去，嘛毋是因為戰爭。」
北方的暴君21「後來會有一個卑鄙的人起來。伊毋是合法的繼承人，毋拘趁人無防備的時，用詭詰的手段奪取王位。
22伊會親像大水將所有反對伊的勢力全部沖散，許個照契約設立的領袖嘛互伊刣死。
23伊及別個國家結盟，就用詭詐的手段，互伊小小的國家漸漸強盛。
24伊趁人無防備的時，侵入對方省內上肥媠的地，做伊的祖先毋曾做過的事，將搶來的戰利品及財寶分互伊的部下，閣用計謀攻取堡壘；不過諸個攏是暫時的。
25「北方的王會導大軍全力攻擊南方的王，南方的王嘛會導強大的軍隊及伊交戰。因為有人設計謀害南方的王，所以南方無法度抵抗。
26謀害南方的王的人是伊的親信，所以伊的軍隊戰敗四散，互人刣死的真多。
27此兩個王攏內心詭詰；雖然做夥食飯，毋拘互相講白賊。𪜶兩旁的計謀𣍐成功，因為所指定終局的時間猶未到。
28北方的王會帶真多財寶轉去本國。伊心內反對上帝子民的信仰。伊照家己的意思做代誌，了後才倒去伊的本國。
29「到指定的時間，伊會閣來攻打南方。毋拘此遍及頂遍無像款。
30因為基提的戰船來攻擊北方的王，伊著驚撤退。
「伊真毋甘願，就照家己的意思破壞伊所怨恨的上帝子民的信仰，用按呢出氣。伊會閣倒來聽許個背叛信仰的人的意見，
31派兵來佔領堡壘，褻瀆聖所，禁止獻逐日著獻的祭互上帝，閣將可惡會致到毀滅的物𫞼佇聖殿。
32伊會用詭計得著違背信仰的人的支持，毋拘許個對上帝忠誠的人會勇敢採取行動。
33有智慧的領袖會教導眾人，毋拘有一段時間𪜶會受殺害，互人燒，互人掠，互人搶劫。
34𪜶佇受迫害的中間，干焦會得著小可的援助，閣會有真多人假意加入𪜶。
35有智慧的人有的會受迫害，按呢是欲給其他的人磨練，佇時期結束以前，給𪜶潔淨互𪜶清白，因為離上帝指定的時猶有一段時間。
36「北方的王會繼續照家己的意思做代誌，自高自大，看家己比所有的神明較大，閣用大聲話褻瀆萬神的神。伊做諸個代誌，佇上帝大受氣結束以前，攏真順利；毋拘上帝決定欲做的事一定會實現。
37北方的王無尊重伊祖先的神明及婦女合意的神明，無給任何神明看在眼內，因為伊自高自大，看家己超過一切。
38伊干焦崇拜堡壘的神明，用金、銀、寶石，及尊貴的物件獻互伊祖先毋識的神明。
39伊靠外國神明的幫贊，攻破上堅固的堡壘。若有人認同贊成伊，伊就給𪜶獎勵，互𪜶管真多人，閣賜土地互𪜶。
40「末期到的時，南方的王會及北方的王交戰。北方的王會派戰車、馬兵、真多戰船，親像捲螺仔風給伊反擊，親像大水沖入許個國的領土。
41北方的王閣會侵入肥閣媠的地，刣死歸千歸萬人，毋拘以東、摩押，及亞捫大部分的人會逃脫免死。
42伊欲閣伸手攻擊逐國，連埃及都𣍐當逃脫。
43伊會掌握埃及的金銀財寶及貴重的物件，閣征服利比亞及古實。
44毋拘對東旁及北旁傳來的消息互伊真煩惱，伊就受氣出兵，欲去消滅真多人。
45伊欲佇海及媠的聖山中間搭堂皇的布棚。毋拘伊的結局已經到啦，無人會當幫贊伊。」
Who We AreWhat We EelieveWhat We Do
2025 by iamachristian.org,Inc All rights reserved.
