詩篇 46 - 現代台語譯本漢字版(TTVH)-闽南语

可拉後代的詩，交互聖樂長；調，用「少女」。上帝及咱同在

1上帝是咱的避難所，咱的氣力，

是患難中及時的幫贊。

2雖然地大變動，

山徙到海中，

3海水夯湧嘩嘩哮，

山因為海漲搖泏，

咱攏免驚。

4有一條河，伊的水流互上帝的城歡喜；

就是至高上帝徛起聖的所在。

5上帝𫢶佇遐，城一定𣍐搖動；

天昲光，上帝就幫贊伊。

6列邦嘩嘩哮，列國動搖；

上帝出聲，地就消熔。

7上主 — 萬軍的統帥及咱同在；

雅各的上帝做咱的要塞。

8來，來看上主的所做，

看伊佇地上奇妙的作為。

9伊遏折弓，斬斷槍，放火燒戰車；

伊互戰爭攏煞，全地和平。

10伊講：「攏靜靜！著知我是上帝！

我佇列邦受尊崇，

佇全地受尊做大。」

11上主 — 萬軍的統帥及咱同在；

雅各的上帝做咱的要塞。