詩篇 40 - 現代台語譯本漢字版(TTVH)-闽南语

大闢的詩，交互聖樂長。頌讚的歌

1我耐心聽候上主；

伊有俯耳孔聽我的哀求。

2伊對死亡的陷坑，對土糜中給我扭起來；

伊互我徛佇石磐頂，互我的腳步穩固。

3伊教我吟新的詩，唱歌謳咾咱的上帝；

真多人看著就敬畏來信靠上主。

4專心信靠上主的人真有福氣！

伊無拜偶像，

無及拜假神的人做夥。

5上主 — 我的上帝啊，你有為阮成就真多奇事；

啥人會當及你比？

你為阮安排的計劃赫呢多，

欲講嘛講𣍐了。

6祭祀及禮物，你無合意；

燒化祭及贖罪祭，你嘛無愛。

你有開我的耳孔通聽，

7所以我應講：「我佇遮！

你對我的指示攏記佇律法。

8我的上帝啊，你的旨意我歡喜聽趁；

你的律法佇我心內。」

9我佇大聚會中宣揚你公義的好消息；

上主啊，你知我欲一直宣揚。

10我毋曾將你的公義蓋密佇心內；

我已經有講起你的信實及救恩。

我毋曾佇大聚會中掩蓋你的慈愛及信實。

11上主啊，求你毋通對我收回你的慈悲；

願你的慈愛及信實不時保守我。

12因為有算𣍐了的災禍圍困我；

我的罪惡趇著我，互我的目睭𣍐看見；

諸個罪惡比我的頭毛較多；

我完全失去勇氣。

求幫贊的祈禱(詩 70)

13上主啊，求你歡喜拯救我；

上主啊，求你緊來幫贊我。

14願數想欲害我性命的人攏漏氣見笑；

願愛我受陷害的人敗退受凌辱。

15願對我講「乎，你慘啊」許個人，

因為見笑滅亡。

16願尋求你的人攏因為你歡喜快樂；

願欣慕你拯救的人時常講：

「著尊上主做大！」

17總是我困苦散赤；

主猶久數念我。

你是我的幫贊，我的拯救；

我的上帝啊，求你毋通延延。