羅馬書 10 - 現代台語譯本漢字版(TTVH)-闽南语

1兄弟姊妹，我的心熱切向望，閣對上帝祈求的，就是以色列人會得著救。

2我會當為著𪜶作證：𪜶對上帝有熱心，毋拘毋是根據正確的了解。

3因為𪜶無明白上帝的義，欲用家己的方法追求及上帝建立合宜的關係，煞無順趁上帝互人成做義人的方法。

4其實，基督已經完成律法的目的，互信的人會當及上帝有合宜的關係。

5關係對靠律法得著的義，摩西有按呢寫：「守律法的人靠律法來活。」

6毋拘關係對信稱義，聖經有按呢講：「你毋通心內講『什麼人會𬦰上天』— 就是講，什麼人會將基督導落來？

7嘛毋通講『什麼人會落去深淵』— 就是講，什麼人會將基督對死人中導起來？」

8諸個話到底什麼意思？意思是：

上帝的話及你真近，

佇你的嘴裡，佇你的心內。

這就是阮所宣揚的信的信息。

9你若用嘴宣認「耶穌是主」，心信上帝有互伊對死人中閣活，就會得著救。

10因為人心信就得著稱義；嘴宣認就得著救。

11聖經有按呢記載：「信伊的人𣍐致到失望。」

12猶太人及外邦人攏無差別，因為有仝一位上帝是萬民的主，伊會豐豐富富賜福互所有求叫伊的人。

13因為「所有求叫主的名的人攏會得救。」

14毋拘𪜶都無信伊，哪會求叫伊？都無聽著，哪會信伊？都無人傳，哪會聽著？

15都無差派，哪會傳？照聖經所記載：「傳播福音的人，𪜶的腳跡偌仔呢媠！」

16毋拘，毋是所有的人攏順趁此個福音。以賽亞講：「主啊，什麼人信阮所傳的信息？」

17所以，信是對聽，聽是對聽基督的話。

18不過我欲問，𪜶豈真正攏毋曾聽著？當然曾！聖經按呢記載：

𪜶的聲音傳遍全地；

𪜶的話傳到天邊海角。

19我欲閣問，以色列人豈真正毋知？代先，摩西替上帝按呢講：

我欲用毋是我子民的人來引起恁怨妒，

用愚戇的子民來激起恁受氣。

20後來以賽亞嘛真好膽替上帝講：

無尋我的人，我有互𪜶尋著；

無求我的人，我有對𪜶顯現。

21毋拘關係以色列人，伊有講：「硬心背逆的子民，我歸日伸雙手歡迎。」