歌羅西書 2 - 現代台語譯本漢字版(TTVH)-闽南语

1為著恁及老底嘉人，以及所有猶毋曾見著我的人，我愛恁知我偌仔呢啲拍拼。

2我的目的是愛𪜶的心受鼓勵，用疼相結連，通得著豐富的理解力，有充分的確信來曉悟上帝的奧祕，就是基督；

3上帝的智慧及智識的一切寶貝攏隱藏佇伊內面。

4我按呢講是愛恁免互人用花言巧語給恁導入迷路。

5雖然我人無佇恁遐，心卻及恁做夥。我看見恁的生活規規矩矩，對基督的信心有堅定，感覺真歡喜。

及基督結連

6既然恁有接受基督耶穌做主，就著及伊結連來生活，

7照恁所受的教示，佇伊內面釘根受起造，信心得著堅固，充滿感謝。

8著謹慎，毋通互人用空洞虛假的哲學給恁迷去，因為許個學說是根據人的傳說及支配宇宙的靈，毋是根據基督。

9因為上帝完整的神聖𫢶佇看會著的基督的形體內面，

10互恁及伊結連成做完整。伊是元首，超越一切靈界的統領者及掌權者。

11恁嘛已經有接受及基督連結的割禮，毋是用人的手，是通過基督的割禮將恁罪性的肉體褪起來。

12對洗禮，恁有及基督做夥埋葬；閣對洗禮，通過信互基督對死人中閣活的上帝的大能，互恁嘛及伊做夥閣活。

13恁以前因為犯罪閣肉體無受割禮，已經死；毋拘現在上帝已經互恁及基督做夥閣活。上帝有赦免咱一切的罪過，

14撤銷對咱不利閣有法律效力的借據，給伊釘佇十字架頂，互伊失效。

15上帝有解除靈界的統領者及掌權者的權勢，互𪜶佇基督凱旋的行列中做戰犯示眾。

16所以，毋通佇飲食，守節期，初一，抑是安歇日的問題互人批判。

17諸個不過是將來的事的影；基督才是實體。

18毋通受許個假謙卑，拜天使的人影響，互恁失去應得的報賞。許個人倚靠幻想，照人的想法，無根無據自誇自大，

19及頭 — 基督斷絕關係。對此個頭，全身軀通過筋及節得著營養，互相連接，照上帝的旨意繼續成長。

及基督同死同活

20-21既然恁及基督做夥死，脫離支配宇宙的靈，哪猶親像屬此世間的人啲生活，遵守「毋通提」，「毋通食」，「毋通摸」此款的禁忌？

22諸個不過是人所造的教規及教示，用了就無路用。

23拜天使，假謙卑，及苦楚身軀，看起來若親像有智慧，其實對控制肉體的情慾攏無路用。