詩篇 93 - 現代台語譯本漢字版(TTVH)-闽南语

上主作王

1上主作王掌權！

伊用威嚴做衫穿；

上主用威嚴做衫穿，

用氣力做帶縖。

伊建立世界，

世界永遠𣍐動搖。

2你的寶座古早就建立；

你對永遠就存在。

3上主啊，大水啲夯湧，

大水夯湧出大聲；

大水夯湧嘩嘩哮。

4上主佇天頂顯出威力，

贏過海洋的大湧，

壓過大水嘩嘩哮的聲。

5上主啊，你的誡命確立𣍐改變；

你的殿神聖，直到永遠。