歷代志上卷 28 - 現代台語譯本漢字版(TTVH)-闽南语

大闢指示起造聖殿

1 大闢召集以色列的領袖、各支族的首領，及輪班服事王的官長、管理一千人及管理一百人的軍官、管理王及王子兒的產業及牲生的官員、太監、勇士，以及重要人臣，攏來耶路撒冷。

2 大闢王就徛起來，講：「各位鄉親，各位同胞，請聽！我本來想欲起造聖殿來安置上主的約櫃，就是咱的上帝的腳砧；我嘛已經準備好勢。

3毋拘上帝對我講：『你𣍐用得為著我的名起聖殿，因為你是戰士，有刣死真多人。』

4毋拘，上主 — 以色列的上帝對阮老父全家族揀選我作王，永遠治理以色列；因為伊揀選猶大做領袖，閣對猶大支族揀選阮老父的家，佇阮老父的子兒中特別意愛我，選立我作王，治理全以色列。

5上主賞賜我真多子，佇我的子兒中揀選我的子所羅門，坐上主的國的王位，治理以色列。

6「上主閣對我講：『你的子所羅門欲起我的殿、我的埕；我揀選伊做我的子，我嘛欲做伊的父。

7伊若親像今仔日堅決遵守我的誡命及命令，我就欲堅固伊的國位，直到永遠。』

8「現在，佇上主的大會，以色列眾人的面前，咱的上帝嘛啲聽，我命令恁著遵行渴慕上主 — 恁的上帝的誡命；按呢，恁就通得著此塊好的土地，留互恁的後代，永遠做產業。」

9 大闢對所羅門講：「我的子所羅門，你著認識你的老父的上帝，全心歡喜服事伊；因為上主監察逐個人的心，知𪜶的心思意念。你若尋求伊，伊會互你尋著；你若放拺伊，伊會永遠棄拺你。

10你著謹慎，因為上主揀選你起造聖殿；你著勇敢去做。」

11 大闢將聖殿的走廊、房間、府庫、樓頂的房間、內殿，及施恩座的所在，所有的設計圖，交互伊的子所羅門；

12將伊對上帝的神所得著關係上主聖殿的埕、四圍的房間、聖殿的府庫，及囥聖物的府庫的設計圖，攏交互所羅門。

13大闢閣給所羅門指示按怎分配祭司及利未人的班次，互𪜶執行佇上主殿內服事的職務，以及管理上主殿內的器具。

14-16大闢閣指示伊用偌多金及銀做逐種服事欲用的金器及銀器，金及銀的燈及燈台，囥獻祭的餅的金桌及銀桌；

17閣指示伊著用偌多純金做肉叉、盤、杯、碗，以及用偌多銀做銀碗；

18閣秤煉過的金做香壇；嘛照設計圖用金做天使基路伯的車，𪜶搋開翼，遮蓋上主的約櫃。

19大闢講：「頂面諸個設計圖，攏是照上主親身指示我寫出來的。」

20 大闢閣給伊的子所羅門講：「你著堅強勇敢去做；毋通驚，毋通懍；因為主上帝，我的上帝，及你同在；伊一定𣍐離開你，嘛𣍐放拺你，直到你完成上主聖殿的工程。

21你看，許個祭司及利未人佇上帝的聖殿服事的職務已經分配好勢，嘛有真多功夫真好的師傅歡喜幫贊你，閣有真多官長及全體人民攏會聽趁你的命令。」