以賽亞書 4 - 現代台語譯本漢字版(TTVH)-闽南语

1佇彼日，七個查某人會擒牢一個查甫人，講：

「阮欲食家己，

欲穿阮家己的衫；

毋拘，請互阮歸屬你的名，

互阮免受嫁𣍐出去的見笑。」

耶路撒冷的重建

2佇彼日，上主的新芛會媠閣茂盛；土地出產的果子，會成做以色列死無去的人的誇耀及榮光。

3許個留佇錫安，就是所有徛起佇耶路撒冷，受揀選猶活啲的人，𪜶攏會受分別作聖。

4上主一定會用審判的神及燒毀的神，洗除錫安住民的垃墋，對𪜶中間洗清耶路撒冷刣人的血跡。

5後來，上主會佇歸座錫安山及所有的會眾頂面，佇日時造雲，佇暝時造有煙及火焰的光；上帝的榮光會親像大布篷搭佇全城頂面。

6按呢，日時通遮太陽的炎熱；狂風暴雨的時通做避難所。