1我互上主受氣的柺刑罰，
受盡苦痛。
2伊趕我入去烏暗，
四面無光。
3伊一再下手拍我，
歸日無停。
4伊互我消瘦落肉；
伊遏折我的骨頭。
5伊用悲慘包圍我，
用苦楚攻擊我。
6伊互我住佇烏暗中，
親像已經死真久的人。
7伊用牆圍困我，互我𣍐當逃脫；
伊用真重的銅鍊給我縛啲。
8我哀求呼叫，
伊毋聽我的祈禱。
9伊用拍過的大石擋我的路，
互我的路嵁硈彎曲。
10伊親像埋伏的熊，
嘛親像匿啲的獅，聽候欲攻擊我。
11伊迫我離開大路，
給我拆碎，放佇邊仔。
12伊開弓，
給我當做紅心射。
13伊用箭袋內的箭，
射入我的心。
14我成做萬民的笑柄；
𪜶歸暝歸日作歌恥笑我。
15伊用苦菜強迫我食，
用苦酒強迫我飲。
16伊用碎石仔磨斷我的嘴齒，
用土沙粉蓋我。
17我的生活失去平安；
我已經𣍐記得幸福是什麼。
18所以我講：我的元氣消失，
毋敢閣期待上主解救我。
19回想我的痛苦及流浪，
親像啲食苦菜，飲苦酒。
20想起諸個事，
我的心沉重鬱卒。
21毋拘當我想起此件事，
我就閣有向望：
22上主的慈愛永遠存在，
伊的憐憫永𣍐斷絕，
23逐早起換新；
你的信實廣大。
24我的心講：上主是我一切福氣的源頭，
所以我欲向望聽候伊。
25信靠伊，尋求伊的人，
上主施恩互𪜶。
26人著吞忍聽候上主的救恩，
因為這是好。
27人應該佇少年的時背伊的軛，
因為這是好。
28人著家己一個恬恬坐啲，
這是上主互伊的軛。
29人應該面仆佇土腳，
按呢可能猶有向望。
30著據在人巴嘴䩃，
忍受一切的凌辱。
31主𣍐永遠棄拺人。
32伊雖然互人憂愁，
猶原會照伊豐盛的慈愛憐憫人。
33伊毋甘互人受苦，
互人憂傷。
34所有受掠的互人踐踏壓制，
主一定關懷！
35至高者所賜的人權受剝削，
主一定關懷！
36人佇法庭受冤枉，
主一定關懷！
37若毋是主的旨意，
人豈會當有什麼成就？
38災禍抑是祝福，
豈毋是攏出佇至高者的命令？
39人因為家己的罪受刑罰，
有什麼通埋怨？
40咱著反省檢討家己的行為，
越轉歸向上主。
41咱著向天頂的上帝，
誠心攑手祈禱。
42阮犯罪背逆，
你無赦免阮。
43你發大受氣，追趇阮；
你下手剿滅阮，攏無留情。
44你匿佇密雲內底，
阮的祈禱𣍐當透到你遐。
45你互阮成做渣滓糞埽，
佇萬民中受棄拺。
46阮所有的對敵
攏大聲攻擊阮。
47阮抵著驚惶及陷阱，
經歷死亡及毀滅。
48為著同胞受毀滅，
我的目屎親像江河直直流。
49我的目屎直直流，
流𣍐停，
50直到上主看顧，
對天憐憫。
51看見城內婦女的遭遇，
我的心非常痛苦。
52敵人無緣無故追趇我，
親像啲掠雀鳥仔。
53𪜶欲互我死，活活㧒落深坑，
閣用石頭塞牢坑口。
54水淹過我的頭殼；
我想：我無命啦！
55上主啊，
我對深坑底求叫你的名。
56你曾聽我的祈求；
求你毋通塞密耳孔，
毋聽我喝救的聲。
57我呼求的時，你有倚近我，
給我講：毋免驚！
58主啊，你曾替我申冤，
贖回我的性命。
59上主啊，你有看見我受委屈；
求你宣判我正直無罪。
60你知對敵按怎怨恨我，
圖謀欲害我。
61上主啊，你有聽見𪜶詈罵我；
知影𪜶害我的計謀。
62你聽見我的對敵歸日攻擊我的話，
及𪜶欲陷害我的陰謀。
63你看，對早起到暗暝，
𪜶不時唱歌睥相我。
64上主啊，
求你照𪜶的行為報應𪜶。
65求你互𪜶心硬，
給𪜶咒詛。
66求你發大受氣追趇𪜶，
給𪜶對上主你的地消滅。
Who We AreWhat We EelieveWhat We Do
2025 by iamachristian.org,Inc All rights reserved.
