1彼時，有幾若千人揢做夥，致到互相踐踏。耶穌就先對伊的門徒講：「著持防法利賽派的酵，就是假好。
2無一項掩蓋的𣍐露現；嘛無一項祕密的𣍐互人知。
3所以，恁佇暗中講的，會佇光明中互人聽著；恁佇房間內耳孔邊講的，會互人佇厝尾頂宣布。」
人應該驚的是上帝(太 10.28-31)4「朋友，我給恁講，害死恁的身軀了後，𣍐當閣對恁做什麼的，毋免驚。
5我欲指示恁應該驚的是叨一位。恁應該驚上帝；伊互人死了後，猶有權通給人㧒落地獄。是！我給恁講，著驚此位！
6「五隻雀鳥仔豈毋是賣兩角銀若定？上帝連一隻都無𣍐記得。
7連恁的頭毛都攏有算過。毋免驚！恁比歸群雀鳥仔閣較貴重！」
公開宣認基督(太 10.32-33；12.32；10.19-20)8「我給恁講，佇人的面前宣認我的，人子佇上帝的天使面前嘛會認伊。
9毋拘佇人的面前毋認我的，人子佇上帝的天使面前嘛毋認伊。
10「無論什麼人講話敵對人子，會得著赦免。毋拘褻瀆聖神的，𣍐得著赦免。
11「恁互人掠到會堂，佇統治者抑是官員面前的時，毋免煩惱著按怎答辯，抑是著講什麼。
12因為彼個時聖神會教恁著講什麼。」
無智慧的財主13眾人的中間有一個人給耶穌講：「老師，請你教我的兄弟及我分家伙。」
14耶穌給伊講：「你此個人，啥人任命我做恁的判官抑是公親？」
15伊就對眾人講：「著謹慎，著持防逐款的貪心，因為人的性命毋是在佇財產的多少。」
16後來耶穌用一個譬喻給𪜶講：「有一個好額人，伊的田園大豐收。
17伊心內想來想去，講：『我無夠所在通囤五穀，今欲按怎？』
18伊就講：『我著按呢做。我欲給倉庫拆起來閣起較大間，通來囤五穀及一切的財物，
19然後對我家己講：呃，你已經積聚真多財物，有夠通用真多年。今清閒啦，來飲，來食，來享受！』
20毋拘上帝給伊講：『戇人！今暝就欲收回你的性命；你所積聚的一切欲留互啥人？』
21仝款，為著家己積聚財富，無互上帝看做好額的嘛會按呢。」
信靠上帝(太 6.25-34)22耶穌閣對伊的門徒講：「所以我給恁講，毋通為著恁的性命欲食什麼啲操煩；嘛毋通為著恁的身軀欲穿什麼啲操煩。
23因為性命比食物較重要；身軀比衣服較重要。
24恁看烏鴉，𪜶雖然無種作，無收成，無粟倉嘛無倉庫，上帝嘛啲給𪜶養飼，恁豈無比許個鳥仔閣較貴重！
25恁豈有人想講操煩會當互家己的性命加活一時仔久？
26既然連即呢細項代誌恁都無才調做，哪著為其他的事操煩？
27恁看山野的花，𪜶按怎啲大欉？𪜶無勞苦，嘛無紡織。不過我給恁講，連所羅門上榮華的時，伊穿的衫都無比諸個花的一蕊閣較媠。
28山野的花草今仔日啲活，明仔載互人㧒落火爐，上帝都按呢給𪜶妝飾，伊閣較會給恁妝飾！恁哪即呢無信心！
29「所以，恁毋通干焦啲想欲食什麼，飲什麼；嘛毋通操煩。
30諸個攏是此世間無信的人所啲追求的。恁的父知恁有需要諸個物件。
31顛倒著代先追求伊主權的實現，諸個物件就會攏續互恁。」
天頂的財寶(太 6.19-21)32「恁細細的羊群啊，毋免驚，因為恁的父歡喜將伊的國互恁。
33著賣恁的財產來賑濟散赤人。著為著恁家己準備用𣍐破的錢袋來積聚用𣍐了的財寶佇天頂；佇遐賊仔提𣍐著，蛀蟲嘛咬𣍐著。
34因為恁的財寶佇叨位，恁的心嘛會佇遐。」
醒醒啲聽候的僕人35「衫著穿好勢；燈著點互𤏸。
36著親像僕人啲聽候主人對婚宴轉來；主人轉來，一下拍門通隨時給伊開。
37主人轉來的時看著僕人醒醒，許個僕人真有福氣！我實在給恁講，主人會家己衫穿好勢，請𪜶坐桌，來給𪜶侍候。
38主人若佇半暝抑是天欲光的時轉來，看著僕人醒醒，許個僕人真有福氣！
39此家的主人若知賊仔什麼時陣會來，一定𣍐互賊仔侵入伊的厝。
40所以，恁嘛著準備便便，因為人子會佇恁想𣍐到的時陣來臨。」
忠實及無忠實的管家(太 24.45-51)41 彼得講：「主啊，你此個譬喻是對阮講，抑是對眾人講？」
42主講：「什麼人是忠實閣聰明的管家？就是主人交代伊管理其他的僕人，照時分食物互𪜶彼個人。
43主人轉來的時，看著有照按呢啲做彼個僕人實在有福氣！
44我實在給恁講，主人會派此個僕人管理伊攏總的財產。
45彼個僕人若心內想講『我的主人𣍐赫緊轉來』，就起手拍其他的僕人女婢，亦食亦飲，閣飲到酒醉。
46彼個僕人的主人會佇伊無按算的日，毋知的時轉來。主人會嚴嚴給伊處罰，給伊及無忠實的人囥做堆。
47「僕人知主人的意思卻無去準備，抑是無照主人的意思去做，伊會互主人拍真悿。
48不過毋知主人的意思去做應該受處罰的代誌，彼個僕人會互主人拍較輕。互伊較多，就對伊提較多；交代伊較多，就對伊要求較多。」
因為耶穌引起分裂(太 10.34-36)49「我來是欲將火㧒落地上，我偌仔呢愛火已經𤏸起來！
50我有應該受的洗禮；此個洗禮猶未受以前，我實在真艱苦！
51恁想講我來是欲互地上和平是無？我給恁講，毋是，顛倒是分裂。
52對今以後，一家有五個人，𪜶會分裂，三個對兩個，兩個對三個。
53𪜶會分裂，
老父對後生，
後生對老父；
老母對查某子，
查某子對老母；
大家對新婦，
新婦對大家。」
會曉看時代的兆頭(太 16.2-3)54耶穌閣給眾人講：「恁看著雲對西旁起來的時，隨時講『啲欲落雨啦』，果然就落雨。
55透南風的時，恁講『啲欲燒熱啦』，就真正燒熱。
56假好的人，恁都會曉判斷天及地的景象，哪𣍐曉判斷此個時代？」
及控告者和解(太 5.25-26)57「恁是按怎毋家己判斷什麼是合理？
58你及控告你的人去見官長的時，著佇路中設法及伊和解；若無，伊會拖你去見判官，判官將你交互法警，法警就給你關落監。
59我給你講，最後的一仙五釐無還清楚，你絕對𣍐當出監。」
Who We AreWhat We EelieveWhat We Do
2025 by iamachristian.org,Inc All rights reserved.
