詩篇 3 - 現代台語譯本漢字版(TTVH)-闽南语

大闢逃閃伊的子押沙龍的時做的詩。求上帝幫贊的早禱

1上主啊，我的對敵哪赫多！

赫多人起來攻擊我。

2𪜶對我講：

「上帝𣍐幫贊你。」

3毋拘，上主，你是保護我的盾牌，我的榮光；

你互我的頭殼攑會起來。

4我出聲求叫上主；

伊會對伊的聖山應我。

5我倒啲，我啲睏，我精神，

上主攏啲保護我。

6就是講有千萬人包圍攻擊我，

我嘛毋驚。

7上主啊，求你起來；

我的上帝啊，求你拯救我。

因為你有搧我對敵的嘴䩃，

有摃斷歹人的嘴齒。

8拯救對上主來；

願你賜福互你的子民。